अति भएपछि प्रतिरोध हुनु स्वाभाविकै हो । सेनाको रात्रीभोजमा सरिक हुन राष्ट्रपतिलगायतका अतिविशिष्ट व्यक्तिहरू जाने क्रम राजधानीको मुख्य सडक लामो समयसम्म थुनिएपछि सवारी चलकहरूले अवज्ञा गरेका छन् । सवारी चालकहरूले ‘हल्ला गरेको’ त ट्राफिक प्रहरीले नै स्वीकार गरेको छ । सामाजिक सञ्जालमा फैलिएको भिडियोमा चालकहरूले एकैपटक हर्न बजाएको र त्यस अवरोधको अवज्ञा गरेर सडकमा सवारी साधन गुडाएको देखिएको छ । त्यस अवस्थामा सडक झन् बढी अस्तव्यस्त र अराजक भएको देखिन्छ । धन्न, कुनै अप्रिय घटना भएनछ । अवरोध र अवज्ञाको यस घटनाबाट विशिष्ट व्यक्तिको सवारीका क्रममा अपनाइने हालको सुरक्षा व्यवस्थामा पुनर्विचार गर्नु अवश्यक छ भन्ने पुष्टि हुन्छ । विशेषगरी सुरक्षा निकायले यसबाट पाठ सिक्न सक्नुपर्छ ।
विशिष्ट व्यक्तिको आवागमनमा सुरक्षाका नाममा राजाकै पालाको जस्तो सडक अवरोध गर्ने चलनलाई जनमानसले स्वीकार गर्न सकेको थिएन । तर, सुरक्षा प्रबन्धका नाममा सडक अवरोध गरेर जनसाधारणलाई सास्ती दिने चलन भने गणतन्त्रपछिको एक दशकमा पनि रोकिएन । बरु, तामझाम र मोटरको ताँती लगाउनेहरूको संख्या बढ्यो । राष्ट्रपति, प्रधानमन्त्रीकै देखासिकीमा मन्त्रीहरूमात्र हैन सुरक्षा निकायका उच्च अधिकृतहरूले समेत अगुवा, पछुवा मोटरको ताँती लिएर हिँड्न थाले । सामन्ती तडकभडकलाई इज्जतको मानक बनाइयो । राजतन्त्र हटाइँदा सामन्ती ढोँग पनि जाला भन्ने ठानेका जनता यसबाट दिक्क भएका थिए । मंगलवार साँझको अवज्ञा यसैको उदाहरण हो । राष्ट्रपतिको धेरै आलोचना सडक अवरोधकै सन्दर्भमा भएको छ । राष्ट्रपतिलगायत विशिष्ट व्यक्तिले राजसी तामझाम र सामन्ती ढोंग अस्वीकार गरेको भए सम्भवतः जनमानसमा गणतन्त्रको छवि बिग्रने थिएन । जनताले एक जना राजा हटे पनि धेरै राजाको शासन खप्नुपरेको ठान्ने थिएनन् ।
अझै ढिलो भइसकेको छैन । असल सुधार जति बेला सुरु गरे पनि समयोचित नै हुन्छ । यसैले विशिष्ट व्यक्तिको सुरक्षामा सम्झौता नगरी जनतालाई असुविधा नहुने उपाय अपनाउनु उचित हुनेछ । बाटो नछेकीकन आवतजावत गराउने, कम चल्तीका सडकबाट हिँडाउने, बाटो रोक्नै परे न्यूनतम समयसम्म मात्र अवरोध गर्नेजस्ता उपाय अपनाउने हो भने जनतालाई सास्ती हुनेछैन । राष्ट्रपति र प्रधानमन्त्रीबाहेक अरूले अगुवापछुवा मोटरको ताँती लिएर नहिँड्ने हो भनेमात्रै पनि जनमानसमा रहेको वितृष्णा केही कम हुनेछ । सुरक्षा निकायका उच्च अधिकृतहरूले आफूले समेत प्रयोग गर्ने हुनाले अहिलेको व्यवस्था बदल्न आनाकानी गर्नसक्छन् । त्यस अवस्थामा राष्ट्रपति स्वयंले जनतालाई असुविधा नहुने गरी प्रबन्ध मिलाउन निर्देशन दिए सुरक्षा निकायले पनि विकल्प खोज्नेछन् । जनतालाई असुविधा हुनेगरी सडकमा निषेध, अवरोध वा नियमन गर्दा अन्ततः अवज्ञा हुन्छ भन्ने स्वीकार गरेर गणतान्त्रिक संस्कार निर्माणका लागि अग्रसर हुन अवज्ञाबाट प्रेरणा लिनु उचित हुनेछ ।