काठमाडौं । नेविसंघमा ३२ वर्षे हदबन्दीको पक्ष र विपक्षमा विद्यार्थी नेताहरुले प्रदर्शन गरेका छन् । निवर्तमान महामन्त्री कुन्दनराज काफ्ले निकट विद्यार्थी नेताले उमेर हदको पक्षमा र संस्थापन पक्षले उमेर हदको विपक्षमा नेपाली कांग्रेस केन्द्रीय कार्यालय सानेपामा प्रदर्शन गरेका हुन् ।
काफ्ले समूहले ३२ वर्ष मुनिको तदर्थ समिति गठनको माग गर्दै आज बिहानैबाट नाराबाजी गरेको थियो । प्रदर्शनकारीलाई कांग्रेस पार्टी कार्यालय प्रवेश गर्ने सडकमै प्रहरीले रोकेको थियो । अरु दिनभन्दा सुरक्षा व्यवस्था कडा पारिएको छ । पार्टी कार्यालयमा केन्द्रीय कार्यसमिति पदाधिकारी, केन्द्रीय सदस्य र पत्रकारलार्इ मात्र प्रवेश गर्न दिइएको छ । फागुन ९ गते उपसभापति विमलेन्द्र निधि र सहमहामन्त्री प्रकाशशरण महतमाथि काफ्ले समूहले दुर्व्यवहार गरेका कारण प्रदर्शनकारीलाई सडक छेउमै रोकिएको हो । यद्यपि काफ्ले समूहले नेताद्वयले आफूहरु माथि हातपात गरेको दावी गर्दै आएको छ ।
नेताहरुमाथि दुर्व्यवहार गरेको विरोधमा संस्थापन पक्षले पनि पार्टीभित्र अनुशानन कायम हुनुपर्ने भन्दै प्रदर्शन गरेको छ । विश्वभाषा क्याम्पसबाट ऋषिकेशजंग शाहको नेतृत्वमा आएका विद्यार्थीहरुले प्रदर्शन गरेका हुन् ।
संस्थापन पक्षको ब्यानर काफ्ले समूहले च्यातिदिएपछि २ पक्षबीच झडपको स्थितिसमेत उत्पन्न भएको थियो । २ पक्ष एकअर्काबीच ढुंगा हानाहानमा उत्रिएका छन् । प्रहरीले लाठीचार्ज गरी प्रदर्शनकारीलाइ तितरबितर पारेको छ ।