काठमाडौं । शसस्त्र प्रहरी बलको एपिएफकी स्टार सरस्वती चौधरीले मनोरञ्जनरमण शर्मा वर्षको उत्कृष्ट महिला भलिबल खेलाडीको अवार्ड जितेकी छन् । वर्षभरी गरेको प्रदर्शनका आधारमा नेपाल भलिबल संघले आफ्ना अध्यक्ष मनोरञ्जनरमण शर्माको नाममा स्थापना गरेको अवार्डको महिला विधामा सरस्वती उत्कृष्ट चुनिएकी हुन् । पुरुषतर्फ अर्को विभागीय टोली त्रिभुवन आर्मीका धनबहादुर भट्ट उत्कृष्ट भए । वर्षको उत्कृष्ट खेलाडी घोषित सरस्वती र धनबहादुरले जनही ३० हजार रुपैयाँ पुरस्कार पाए । 
राष्ट्रिय खेलकुद परिषद्का उपाध्यक्ष पिताम्बर तिम्सिना, भलिबल संघका अध्यक्ष मनोरञ्जनरमण शर्मालगायत पदाधिकारीले सरस्वती र धनबहादुरलाई सम्मान गरेका थिए । रामेछापमा जारी भलिबल प्रतियोगितामा सहभागि भएका कारण धनबहादुर सम्मान कार्यक्रममा उपस्थित थिएनन् । गतवर्ष भएका ११ मध्ये १० प्रतियोगितामा एपिएफ च्याम्पियन हुँदा सरस्वती उत्कृष्ट खेलाडी भएकी थिइन् । 
उनको एपिएफ यो वर्ष ८ प्रतियोगितामा च्याम्पियन हुँदा सरस्वती ८ प्रतियोगितामा नै उत्कृष्ट खेलाडी भएकी थिइन् । यस्तै आर्मीका धनहादुरले उत्कृष्ट प्रदर्शन गर्दै आएका छन् । खेलाडीको प्रतिभालाई सम्मान गर्ने उद्देश्यले संघले गत वर्षबाट अध्यक्षको नाममा कार्यक्रम गर्न थालेको हो ।