एजेन्सी । नान्टेसका खेलाडीहरुले फ्रान्सेली लिग वानअन्तर्गत बुधबार राती सेन्ट इटेनविरुद्ध १–१ को बराबरीमा टुंगिएको खेलमा टिमका पूर्व सहयात्री इमिलियानो सालाको नामअंकित जर्सी लगाएर मैदान उत्रिए । अर्जेन्टिनी स्ट्राइकर साला उडेको विमान वेपत्ता भएपछिको पहिलो खेलमा पूर्व सहयात्रीको सम्मानमा नान्टेसका खेलाडीले उनको नाम अंकित जर्सी लगाएका हुन् । साला र पाइलट डेविड इबोट्सन रहेको सानो विमान जनवरी २१ मा च्यानल आइल्यान्डवरीपरी पुगेपछि वेपत्ता भएको थियो । 

नान्टेसबाट इङलिस प्रिमियर लिगको टोली कार्डिफ सरुवाको प्रक्रिया पूरा गरेपछि कार्डिफतिर लागेका २८ वर्षे साला जीवित नरहेको विश्वास गरिएको छ । उनको सम्मानमा बुधबारको खेलअघि पनि रगशालामा भावुक सम्मान कार्यक्रम आयोजना गरिएको थियो । खेलअघि नान्टेसको जर्सीमा रहँदा सालाको खेलको भिडियो प्रदर्शन गरिएको थियो । दर्शकहरु सालाको सम्मानमा रोइरहेका थिए भने अर्जेन्टिनाको झण्डा र सालाको फोटो रंगशालाभरी प्रदर्शन गरिएको थियो ।