काठमाडौं । विवेकशील साझा पार्टीबीच एकता भएको १७ महिनापछि विभाजन भएको छ । संयोजकमध्येका एक उज्वल थापाले केहीदिन पहिले पार्टीमा आन्तरिक छलफलका लागि बुझाएको प्रतिवेदनले नै पार्टी फुटको संघारमा रहेको कतिपयले आशंका गरेका थिए । 
शुक्रबार उनै थापा नेतृत्वमा नयाँ दल दर्ताका लागि निर्वाचन आयोगमा निवेदन दर्ता भएको छ । उनीहरुले विवेकशील साझाको नेतृत्वमा समस्या रहेको आरोप लगाउँदै आएपनि संयोजक रवीन्द्र मिश्रले भने शनिबार पत्रकारहरुसँग अन्तरक्रिया गर्दै नेतृत्वमा कुनै पनि समस्या नरहेको स्पष्ट पारे ।
उनले आफूमाथि अनेकौं आरोप लागेको भए पनि आफूले कुनैपनि हालतमा त्यसरी आरोप नलगाउने प्रतिवद्धता व्यक्त गरे ।
मिश्रले फेरि पनि मिलनबिन्दु फेला पर्न सक्ने बताए ।
यस्तो छ शनिबार मिश्रसँग भएको अन्तरक्रियाको सम्पादित अंशः

अब वैकल्पिक राजनीति पनि सम्भव रहेनछ भन्ने देखिएको हो ?
हामीलाई कति दुःख लागेको छ भन्ने साथीहरुले पनि भन्नुभयो । वैकल्पिक राजनीतिक पार्टी बन्न सक्दैनकी भन्ने आशंका व्यक्त गर्नुभयो । मैले यसलाई कसरी व्याख्या गर्न चाहन्छु भने हामीले राजनीति गर्ने समाज र धरातल नेपाली धरातल हो । नेपाली धरातलका विरोधाभाष र जटिलताहरु, नेपाली धरातलमा आउने अरु समस्याहरु वैकल्पिक पार्टी निर्माणमा प्रतिविम्बित हुन्छन् नै । तर तिनीहरुलाई पार गर्दै जानुपर्छ । मैले अघि पनि भनेको थिएँ । २०४६ सालपछि वैकल्पिक राजनीतिका लागि धेरै राम्रा मान्छेले धेरैपटक प्रयास नगरेका होइनन् । धेरैले गरेका हुन् । पुराना पार्टीबाट हुँदैन भनेरै लागेका हुन् । तर उनीहरु एकअर्को कारणले कि अन्त्य भए कि विखण्डित भए कि सानो आकारमा रहे । हाम्रो चुनौती त्यहाँभन्दा माथि उठौं भन्ने थियो । माथि उठ्ने क्रममा यसपल्ट जस्तो किसिमको जटिलता आयो । मलाई अझै पनि कस्तो लाग्छ भने एउटा बिन्दु आउँछ । जहाँ हामी अडिनेछौं र सशक्त भएर अघि बढ्छौं ।

के असर पर्ला ?
एउटा कुरा म के विश्वास दिलाउन चाहन्छु भने यो यात्रा कुनै पनि हालतमा रोकिँदैन । यो यात्रामा साथ दिने साथीहरु देशभरि नै हुनुुहुन्छ । प्रदेश ७, ६, ५, ३, ४ का संयोजक, जिल्ला संयोजकहरु हामी सबै एकै ठाउँमा छौं । हामीलाई साथ दिने सन्देश आइरहेका छन् । यो यात्रा सशक्त रुपमा अघि बढ्छ । अवरोध नसोचेको ढंगबाट आयो । नमिलेका कुराहरु पनि थिए ।
मैले फेसबुकमा छुट्टिएर गएका मित्रहरुलाई प्रेमपत्र भनेर लेखेको थिएँ । त्यो प्रेम अझै पनि बाँकी छ । कुनै आग्रह र पूर्वाग्रह छैन । अझै पनि भन्छु आउनुहोस् सँगै हिडौं । संवाद नगरी हुँदैन । सुसंस्कृत राजनीति गर्ने हो भने आचरण पनि हुनैपर्छ । नजानेको यात्रामा सँगै हिँड्दा हाम्रा तर्फबाट पनि केही कमजोरी भयो होला छाडेर जानेहरुबाट पनि भयो होला । सँगै हुँदा जुन उत्साह थियो छाडेर जाँदा केही चिसोपना आएको छ । उहाँहरुलाई हामीले शुभकामना दिन चाहन्छौं । हामीलाई पनि उहाँहरुले शुभकामना दिनुनै हुन्छ नै । यो देश रुपान्तरण गर्ने हामी नै हुनेछौं । 

भेट्ने प्रयास भयो कि सामाजिक सञ्जालमा मात्रै प्रेमपत्र ?
कुनै पनि घटना घटिसकेपछि त्यसको तापक्रम घट्न दिनुपर्छ । तापक्रम नघट्दै तपाइँले संवाद गर्न खोज्नुभयो भने त्यसले दुर्घटना निम्त्याउन सक्छ । औपचारिक संवादलाई हामीले कहिले पनि बन्द गर्दैनौं । मैले लेखेको छोटो पत्रमा हामी सँगै बसेर चिया खाउँ र हाम्रै साथीले सञ्चालन गरेको रिसोर्टमा जाने तयारी थियो सँगै जाउँ भनेर पनि लेखेको छु ।

आर्थिक पारदर्शितामा प्रश्न उठेको छ । अनि सम्पत्ति बाँडफाँट कसरी ?

आर्थिक पारदर्शिता मात्रै होइन । अलिकति अरु पनि कुरा गर्न चाहन्छु । छाडेर जाने साथीहरुले लगाएको आरोपको मैले जवाफ दिएको छैन । जुनदिन उज्वलजीको प्रतिवेदन आयो त्यसबेला मैले भनेको पनि थिएँ । घरभित्रको विवाद चौतारोमा छताछुल्ल पार्न चाहन्नँ । आर्थिक पारदर्शिता मात्रै होइन अरु पनि आरोप लगाइएको छ । त्यसैगरी मैले पनि आरोप लगाएँ भने धेरै लगाइन सक्छन् । हिलो छ्यापाछ्याप गर्ने पक्षमा छैन । मलाई तपाईँहरुले उक्साउनुभयो भने पनि म त्यो काम गर्ने छैन ।
गएको एक महिनामा करिब १५ लाख उठायौं । हरेकको रेकर्ड छ । कसले कति दिएको भनेर फेसबुकमा राखेका छौं । त्योभन्दा बढी पारदर्शिता के हुनुपर्यो ?
सम्पत्ति बाँडफाँटको कुरा नयाँ भयो अनपेक्षित भएकाले यो कुरा कानुनी रुपमा नै बुझ्नुपर्छ । हामी तयार भएर बसेका थिएनौं अब सोँच्नुपर्छ । 

नयाँ पार्टीबाट देश चल्दोरहेनछ भन्ने बुझ्ने अब ?
पुरानै पार्टी ठिक हुँदै होइन हामी नै ठिक हौं । पुरानो पार्टीभन्दा ठिक भन्नुको अर्थ कुनैपनि गल्ती नगर्ने कतैबाट आएको प्राणी होइन । हामी मान्छे हौं गल्ती गर्छौं तर बेइमानी गर्दैनौं । मानवीय कमजोरीका परिणाम निस्कदै गर्छन् तर जुध्दै जानुपर्छ । यो देश रुपान्तरण गर्ने हो भने यो भन्दा ठूला अवरोध चिर्नैपर्छ । हामी तुलनात्मक रुपमा राम्रो काम गरेरै जान्छौं । 
हामीलाई विधि र प्रक्रिया मिच्यो भन्ने आरोप लाग्यो । विधि र प्रक्रिया कहीँ पनि मिचिएको छैन । बरु उज्वलजीले अस्ति अन्तर्वार्ता दिँदा संयोजक सेरेमोनियल भन्नुभएछ । मसँग सम्झौतापत्र पनि छ । मलाई अचम्म लागेको कुरा के हो भने ३२ बुँदे सम्झौतापत्र अहिलेको पार्टी सञ्चालनको आधार हो । बरु उज्वलजीको प्रतिवेदन विधि र प्रक्रिया मिचेर लेखिएको प्रतिवेदन हो । तर त्यति हुँदा हुँदै पनि छलफल गर्न तयार थियौं । 

अब तपाईँहरुको पार्टीको नाम विवेकशील हुन्छ कि हुँदैन ?
उहाँहरुले नाम लिएर जानुभयो भने भिन्दै कुरा नभए हामी विवेकशील साझा नै हौं । 

पार्टी फुट्दैछ भन्ने कुरा तपाईँले कतिबेला थाहा पाउनुभएको थियो ?
हामी पार्टी फुट्दैछ र साँच्चिकै साथीहरु छाडेर जाँदै हुनुुहुन्छ भन्ने प्रेसबाटै थाहा पाएको हो । तर त्यो भन्दाअघि पहिले विवेकशील दलमा संलग्न केही व्यक्तिहरुले फेसबुक ग्रुप बनाउनुभएको रहेछ । यो पार्टीलाई अलग बनाउनुपर्छ र विवेकशील पार्टी नै बनाउनुपर्छ भनेर एउटा समूह बनाउनुभएको रहेछ । त्यसको स्कृन सट पनि मैले पढेरै सुनाउँछु–विवेकशील नेपाली दलले तय गरेको उद्देश्यको समीक्षाका लागि यो ग्रुप बनेको हो । विवेकशील नेपाली दल पुनरावृत्तिको कार्यदिशासमेत छलफल भएका छन् । विवेकशील नेपाली दलको प्रतिनिधि उज्वल थापाले प्रतिवेदन नै सार्वजनिक गरेकाले त्यसउपर छलफल आइतबार होस् र दलको पुनरावृत्ति गर्नुपर्ने आवश्यकता रहे स्पष्टता आओस् । उज्वलजीको प्रतिवेदनले यी धेरै विषय समेट्न सक्छन् । एक किसिमको एक्सरसाइज पहिलेदेखि नै भएको रहेछ भन्ने स्पष्ट हुन्छ । तर केन्द्रीय समितिकै साथीहरु यसरी अनायासै छाडेर जानुहुन्छ होला भन्ने लागेको थिएन ।
फाइल तस्बिर