काठमाडौं । रविसंकर पासवाङले गोल गरेपछि विभागीय टिम नेपाल पुलिस क्लब हारबाट जोगिएको छ । सशस्त्र प्रहरी बलको हलचोक मैदानमा भएको सहिद स्मारक ‘ए’ डिभिजन लिगको आफ्नो अन्तिम खेलमा सरस्वती युथ क्लबले पुलिससँग १—१ गोलको बराबरी खेलेको हो ।

खेलको ५० औं मिनेटमा पुलिसका खेलाडीले सरस्वतीका खेलाडीलाई पेनाल्टी बक्समा फाउल गरेपछि पाएको पेनाल्टी प्रहार गरेका भिक्टर अमोबीले टिमलाई अग्रता दिलाएका थिए ।
उनले प्रहार गरेको बल गोलकिपरले छेक्न नसकेपछि पुलिस एक गोलले पछि परेको थियो । तर, अग्रता बनाएको सरस्वतीको खुसी धेरै समय टिक्न पाएन । ५३ औं मिनेटमा पुलिसका निर कुमार राईको पासमा रविशंकर पासवाङले गोल गरेपछि पुलिस र सरस्वतीको खेल बराबरी भएको थियो ।

लिगका १३ खेलमा ५ जित ५ बराबरी तथा ३ हार बेहोरेको पुलिस १९ अंकसहित छैठौं स्थानमा रहेको छ भने समान १३ खेल खेल्दै ४ जित, ७ हार र २ खेल बराबरी खेलेको सरस्वती ९ औं स्थानमा रहेको छ ।

मनाङ—मस्याङ्दी क्लब च्याम्पियन र संकटा क्लब दोस्रो भएका छन् । थ्रीस्टार क्लब र त्रिभुवन आर्मी क्लब तेस्रो स्थानको दौडमा रहेका छन् ।