काठमाडौं । नेपाली कांग्रेसका महामन्त्री डा. शशांक कोइरालाले सरकारले नै निर्मला पन्तका हत्यारालाई संरक्षण गरेको पुष्टि भइसकेको दाबी गरेका छन् । कञ्चनपुरको बेलौरीमा शुक्रबार आयोजित कांग्रेसको क्षेत्रीय सम्मेलनमा महामन्त्री कोइरालाले निर्मलाका हत्यारालाई पक्राउ नगर्नुुले नै सरकार हत्याराको संरक्षणमा लागेको पुष्टि भएको दाबी गरे ।
‘‘सरकार अपराधीलाई छेकिरहेको छ । यसैबाट सरकार नै प्रत्यक्ष–अप्रत्यक्ष संलग्न रहेको पुष्टि हुन्छ,’’ उनले भने । उनले अहिलेको सरकारसँग दुई तिहाईको दम्भ बाहेक केही पनि नभएको टिप्पणी गरे । ‘‘सरकारले केही गर्न सकेको छैन् । दुई तिहाईको दम्भ छ तर नवीन योजनाहरु केही छैनन्,’’ महामन्त्री कोइरालाले भने, ‘‘जतिपनि छन् अन गोइङ योजनाहरु छन् । ति योजनाहरु सबै कांग्रेस सरकारको पालाका योजनाहरु हुन् ।’’
उनले नेता र कार्यकर्ताहरुका बीचमा एकता भए कांग्रेसलाई कसैले पनि पराजित गर्न नसक्ने दाबी गरे । ‘‘एकतावद्ध भए कसेले पराजित गर्न सक्दैन । पार्टीलाई एक बनाउन कार्यकर्ताहरुको पनि उत्तिकै हात रहन्छ,’’ कोइरालाले दाबी गरे ।
आपसी मित्रता र सबैको सहभागिता भए आगामी निर्वाचन जितेर कांग्रेस पहिलो पार्टी बन्नेमा ढुक्क देखिएका महामन्त्री कोइरालाले कार्यकर्ताहरुलाई कांग्रेसमा एकताको मलजल गर्न आग्रह गरे । ‘‘एकतावद्ध भए हामी आफ्नो गन्तव्यमा पुग्छौं, पुग्छौं, पुग्छौं । तर त्यो तपाईहरुमा निर्भर रहन्छ । तपाईहरुले मलजल कति दिनसक्नुहुन्छ,’’ उनले भने ।