काठमाडौं । कञ्चनपुरको भीमदत्तनगर–२ महुलियाकी १३ वर्षीय किशोरी निर्मला पन्तको बलात्कारपछि हत्याको आशंकामा पक्राउ परेका दुई जनामाथि अनुसन्धान जारी छ । केन्द्रीय अनुसन्धान व्युरो (सिआईबी)ले काठमाडौंमै राखेर भीमदत्तनगर–१८ का प्रदीप रावल र विशाल चौधरीमाथि अनुसन्धान जारी राखेको हो । हत्या भएको भण्डै ४ महिनापछि प्रहरीले दोस्रोपटक निर्मलाको हत्याराको नजिक पुगेको बताइरहेको छ । यद्यपि अनुसन्धान पूर्ण नहुँदै अहिल्यै केही भनिहाल्ने अवस्था भने छैन ।

तर, प्रहरीले हत्याराको नजिक पुगेको बताइरहेको छ । प्रहरीले आन्तरिक रुपमा निर्मला हत्यामा प्रदीप र विशालकै संलग्नता रहेको निकष्र्ष निकालिसकेको बताइन्छ । प्रहरी स्रोतले भन्यो, ‘‘निर्मलाको हत्यामा प्रदीप र विशालकै संलग्नता पुष्टि गर्ने आधारहरु छन् । अहिले नै सबै कुरा खोल्न मिल्दैन ।’’ प्रदीप र विशाल साथी हुन् । उनीहरु दुवैले लागुपदार्थ सेवन गर्ने गरेको स्थानीय पनि बताउँछन् । तर स्थानीयले निर्मला हत्यामा दीलिपजस्तै नक्कली अभियुक्त बनाइएको त होइन भन्ने आशंका समेत गर्दै आएका छन् । स्थानीयले घटनाको सत्यतथ्य बाहिर ल्याउनुपर्ने माग गरेका छन् । विशाल र प्रदीपको डिएनए परीक्षण रिपोर्ट भने आउन बाँकी छ । 

विशालले मुख थुने, प्रदीपले बलात्कार गरे
प्रहरी स्रोतको दाबीलाई आधार मान्ने हो भने प्रदीप र निर्मलाको चिनजान भने पहिले पनि थियो । साउन १० गते साथी रोशनी बमको घरमा गएकी निर्मला दिउँसो २ बजेतिर बाहिरिएपछि बाटोमा प्रदीपको निर्मलासँग भेट हुन्छ । निर्मलाको साइकलको चेन बिग्रीएपछि उनीहरु हिँड्दै उखुबारी भएको स्थानसम्म आइपुग्छन् । त्यो बीच भागमा साइकल मर्मत गर्ने पसल भने छैन । प्रहरी स्रोतका अनुसार प्रदीपसँग विशाल पनि थिए । दुवैको बयानलाई उद्धृत गर्दै स्रोतले भन्यो, ‘‘कुराकानी गर्दागर्दै हामी उखुबारीसम्म आइपुग्यौं । त्यहाँसम्म पुगेपछि हामीले एकछिन पारी बसौं न भन्यौ र पुल तर्यौं । पुलपारी गएपछि हामी उत्तेजित भयौं र निर्मलाको मुख थुनेर उखुबारीमा लग्यौं ।’’

प्रहरीसँगको बयानका क्रममा विशालले दिएको बयान उद्धत गर्दै स्रोतले भन्यो, ‘‘उखुबारीमा निर्मलालाई लैजाँदा मैले उसको पिठ्युँमा कुहिनाले ४–५ पटक हिर्काएँ । त्यसपछि प्रदीपले बलात्कार गर्दा मैले निर्मलाको मुख च्यापे । त्यतिबेला निर्मलाको शरीर शिथिल भइसकेको थियो । त्यसपछि मैले पनि यौन क्रियाकलाप गरे । निर्मलाको योनीबाट रगत देख्दा हामीलाई डर लाग्यो र हामीले घाँटी थिचेर मारेका हौं ।’’ त्यसपछि विशाल र प्रदीप छुट्टिएका थिए । प्रहरीसँगको बयानका क्रममा उनीहरुले आफूहरुले बलात्कार गरेको समयमा कुकुर भुकेको बताएको स्रोतले बतायो ।

यसअघि अनुसन्धानका क्रममा पक्राउ परेका उखुबारी नजिकै घर भएका चक्र बडु र उनको परिवारका सदस्यले भने दिउँसो एक्कासि कुकुर भुकेको बताएका थिए । प्रहरीले कुकुरको भुकाईबाटै अनुसन्धान सुरु गरेको थियो । निर्मला हत्याकाण्डमा गत भदौ ४ गते प्रहरीले भीमदत्तनगर–१९ बागफाँटाका ४१ वर्षीय दिलिपसिहं विष्टलाई पक्राउ गरेको थियो । तर निर्मलाको शरीरबाट निकालिएको ‘स्वाब’सँग डिएनए नमिलेपछि उनी छाडिएका थिए । दिलिपलाई प्रहरीले नक्कली अभियुक्त बनाएको भन्दै कञ्चनपुरमा आन्दोलन चर्किएको थियो । आन्दोलनका क्रममा स्थानीय शनि खुनाको प्रहरीको गोली लागेर मृत्यु भएको थियो । 

साउन १० गते पक्राउ परेका थिए, विशाल र प्रदीप तर.......
साउन ९ गते राति कञ्चनपुरको भीमदत्तनगर–१८ भगतपुरमा पाले चौधरीले सञ्चालन गरेको मासु पसलबाट कुखुरा चोरी हुन्छ । पाले चौधरी बिहानै अस्थायी प्रहरी चौकी सालघारीमा उजुरी लिएर पुग्छन् । पालेकै शंकाको आधारमा प्रहरीले स्थानीय प्रदीप रावललाई साढे १० बजेको समयमा पक्राउ गर्छ । प्रदीपले आफूले कुखुरा नचोरेको र विशालले चोरेको हुनसक्ने बताएपछि प्रहरीले प्रदीपलाई साढे १० बजेदेखि ११ बजेको समयमा छाडिदिन्छ । १० गते साँझ ६ बजे आसपासको समयमा कुखुरा चोरेको आरोपमा स्थानीय विशाल चौधरी पक्राउ पर्छन् ।

साँझ पक्राउ परेका विशाललाई वडा प्रहरी कार्यालयको हिरासतमा राखिएको थियो । साउन ११ गते बिहान ११ बजेसम्म पनि पाले चौधरीले प्रहरीमा सम्पर्क नगरेपछि विशाललाई प्रहरीले छाडेको थियो । साउन १० गते प्रदीप र विशाललाई प्रहरीले पक्राउ गरेको थियो । तर बिहान ११ बजेअघि नै साउन १० गते प्रदीप छाडिएका थिए भने साँझ ६ बजे पक्राउ परेका विशाल ११ गते बिहान छुटेका थिए । अनुसन्धानका क्रममा निर्मला पन्तको हत्या साउन १० गते दिउँसो २ देखि ३ बजेको समयमा भएको हुनसक्ने खुलेको छ । (उल्लेखित विषयको पुष्टि जिल्ला प्रहरी कार्यालय कञ्चनपुरका एसपी कुवेरसिहं कडायतबाट गरिएको हो । )

१८ वर्षीय रावल लागु औषध दुव्र्यसनी हुन् । प्रदीपका आमाबुबा दुवै भारतको बैंङलोरमा रोजगारी गर्दै आएका छन् । स्रोतका अनुसार साउन १० गतेसम्म महेन्द्रनगरमै रहेका प्रदीप साउन ११ गते गड्डाचौकी नाका हुँदै भारतको खटीमा गएका थिए । खटीमामा प्रदीपको मामाघर भएको बताइएको छ । ‘‘झण्डै १० दिन भारतमा बसेपछि प्रदीप फेरि महेन्द्रनगर आएपछि हामीले समातेका थियौं, साउन २० गते । पछि उनलाई तारेखमा छाडिएको हो । त्यसपछि उनी फेरि हराए,’’ स्रोतले भन्यो । साउन १० गते प्रदीपले साथीहरुसँगै लागुऔषध सेवन गरेका थिए ।