बीबीसी । यसै हप्ता अमेरिकी गायक निक जोनससँग विवाह गरेकी बलिउड अभिनेत्री प्रियंका चोपडाले बुधबार मात्र आफ्नो इन्स्टाग्राम अकाउन्टमा विवाहको पहिरन विस्तृत जानकारीसहित पोस्ट गरेकी छन् । शनिबार पश्चिमी शैलीमा विवाह गरेपछि आइतबार फेरि जोनस र चोपडाले हिन्दू परम्परा अनुरुप पनि विवाह गरेका हुन् जसका तस्बिर फ्यानहरुमाझ शेयर गर्दा प्रियंका पुनः चर्चामा आएकी हुन् ।
विवाहमा प्रियंकाले अमेरिकाका प्रख्यात डिजाइनर राल्फ लरेनको गाउन लगाएकी थिइन् जसमा २० लाख मोतीका मसिना सिक्काहरु जडान गरिएको थियो । तरपनि समारोहमा उनको घुम्टोले नै सबैको ध्यानाकर्षण गराएको हो किनकी उनले पहिरेको सेतो घुम्टो ७५ फिट अर्थात २२.८६ मिटर लामो रहेको थियो । गत मेमा भएको बेलायती राजकुमार ह्यारीको विवाहमा पनि मेगानको १६ फिट लामो घुम्टोबारे निकै चर्चा भएको थियो । तर प्रियंकाले उनको भन्दा लगभग पाँच गुना लामो घुम्टो ओढेर मेगानको रेकर्ड तोडेकी हुन् ।
यसरी समारोहमा प्रियंकाको लामो घुम्टो व्यवस्थित राख्न एउटा सानो टोली नै खटाउनु परेको थियो । यता प्रियंकाले सो तस्बिर सार्वजानिक गरेपछि सामाजिक संजालमा यसबारे थुप्रै प्रतिक्रिया आइरहेका छन् । प्रियंका र मेगान मिल्नेसाथी भएकाले पनि धेरैले उनको पहिरनको छनौटलाई व्यङ्ग्यात्मक ठहर गर्दै यसबारे विभिन्न ट्रोल बनाइएको हो । उमेरमा १० वर्षको अन्तर रहेको जोनस र प्रियंकाको प्रेम सम्बन्ध सार्वजानिक भएको केही समयमै उनीहरुले औँठी साटासाट गरेका थिए जसले हलिउडमा समेत सक्रिय रहँदै आएकी प्रियंकालाई सबैतिर थप चर्चामा ल्याएको थियो ।