जनताले सडकमा मात्र हैन सिंहदरबारको मूल ढोकामै गृहमन्त्री रामबहादुर थापाको राजीनामा माग्न थालेपछि सत्तारुढ दलकै भातृ संगठनले प्रहरी महानिरीक्षक बर्खास्त गर्न माग गरेको छ । सत्तारुढ नेपाल कम्युनिस्ट पार्टी  (नेकपा) को विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियनका दुवै घटकका अध्यक्षहरूसहितले गृहमन्त्रीलाई ज्ञापनपत्र बुझाएर प्रहरी महानिरीक्षक हटाउन माग गरेको समाचार सार्वजनिक भएको छ । सडकबाट गृहमन्त्रीको राजीनामा माग्ने नागरिकहरूले मूलतः कञ्चनपुरकी बालिका निर्मला पन्तको बलात्कारपछि गरिएको हत्याको अनुसन्धानमा हेलचेक्य्राइँ र बदनियत गर्ने प्रहरीको संरक्षण गरिएको आरोप लगाएका छन् । देशभरजस्तै निर्मलाका निम्ति न्यायका लागि आन्दोलन भइरहेको छ र आन्दोलनकारीले गृहमन्त्रीको राजीनामा माग्न थालेका छन् । 

निर्मलाको बलात्कार र हत्याको छानबिन गर्दा प्रहरीले हेलचेक्य्राइँ गरेको ठहर सरकारले गठन गरेको छानबिन समितिले नै लगाएको छ । गृहमन्त्री स्वयंले प्रतिवेदनका केही बुँदाको जानकारी सार्वजनिकरूपमा दिइसकेका छन् । छानबिन प्रतिवेदन गृहमन्त्रीलाई बुझाइसकिएको छ । तर, प्रतिवेदन सार्वजनिक गरिएको छैन । निर्मलामाथि बलात्कार भएको प्रमाण मेटाउने प्रयास प्रहरीले नै गरेकाले अपराधीलाई सरकारले संरक्षण गरेको सन्देह सर्वसाधारण जनताले गरेका हुन् । निर्मला बलात्कार तथा हत्या प्रकरणमा प्रधानमन्त्री केपी शर्मा ओली र गृहमन्त्री रामबहादुर थापाका अभिव्यक्तिहरू पनि विवादास्पद रहेका छन् । प्रहरी महानिरीक्षकभन्दा माथिल्लोतहबाटै अपराधीको संरक्षण भएको हुनसक्ने शंका जनताले गरेको देखिएको छ । यसैले जनताले गृहमन्त्रीको राजीनामाको माग गरेको हुनुपर्छ । प्रहरी महानिरीक्षक वा कुनै पदाधिकारीको परिवर्तन खासै महत्त्वपूर्ण विषय हैन । तर, त्यस प्रकारको विवेकहीन चालबाजीबाट संगठनलाई कति हानि पुग्छ भन्ने उदाहरण नेपाल प्रहरी बनिसकेको छ । यस्तै, कुबेलामा कुनै संगठनलाई चलाउन खोज्दा कति प्रत्युत्पादक हुन्छ भन्ने अनुभव अहिलेका गृहमन्त्रीलाई तत्कालीन रक्षामन्त्रीका रूपमा पनि भइसकेको हुनुपर्छ ।

राजनीति गर्नेहरूले आफूले गरेको गल्ती वा बदमासीमा समेत कर्मचारीलाई ‘बलीको बोको‘ बनाउने प्रयास यसअघि पनि धेरैपटक गरिसकेका छन् । नेपाल प्रहरी त झन् राजनीतिक खेल मैदान नै बनाइएको छ । सडकबाट गृहमन्त्रीको राजीनामा मागिएकाले प्रहरी महानिरीक्षकमाथि दोष लगाएर विरोध साम्य बनाउने सोचले नै सत्तारुढ दलको भातृ संगठन परिचालित गरिएको हुनसक्छ । तर, सडकबाट शान्तिसुरक्षाकै विषयमा प्रधानमन्त्रीको राजीनामा माग्न थालियो भने सायद त्यतिबेला नेपाल कम्युनिस्ट पार्टी (नेकपा)कै नेताहरूले गृहमन्त्रीको राजीनामा माग्नेछन् ।तर, जनताको माग भने मूलतः राजीनामा नभएर न्याय हो । यसैले सरकार सञ्चालन गर्नेहरूले निर्मला बलात्कार तथा हत्याको प्रतिवेदन सार्वजनिक गरेर न्याय हुने जनतालाई विश्वास दिलाउने प्रयास गर्नुपर्थ्यो । अझै पनि पहिले नै विफल भइसकेको उपाय दोहोर्‍याउन कलाविहीन नाटक गर्नुभन्दा इमानदारीपूर्वक न्याय दिने प्रयास गर्नु उचित हुनेछ । ‘राजीनामा राजीनामा‘ खेलेर अपराधी उम्काउन खोजिएको हो भने त्यो स्वयं सरकारका लागि प्रत्युत्पादक हुनेछ ।