काठमाडौं । राप्रपा नेपाल र राप्रपाबीच मंसिर ६ गते पार्टी एकता हुने भएको छ । पटक पटक भएका प्रयास असफल भएका थिए । यसअघि एकताको निर्णय भैसकेपछि पनि अन्तिममा एकता हुन सकेको थिएन । मंगलबार विहान राप्रपा अध्यक्ष पशुपति शमशेर राणाको निवासमा दुवै पार्टीका अध्यक्षले पार्टी एकताको संयुक्त विज्ञप्तिमा हस्ताक्षर गर्दै मंसिर ६ गते एकता गर्ने जानकारी गराएका हुन् ।

देशमा बलियो राष्ट्रवादी प्रजातान्त्रिक शक्ति निर्माण गर्ने उद्देश्यका साथ राप्रपा नेपाल र राप्रपाबीच एकता गर्ने निर्णय गरिएको संयुक्त विज्ञप्तिमा उल्लेख छ । संयुक्त विज्ञप्तिमा कमल थापा र पशुपति शमशेर राणाले हस्ताक्षर गरेका छन् ।

एकीकृत पार्टीको महाधिवेशन सकेसम्म माघ महिनाभित्रै गर्ने उल्लेख छ । दुवै पार्टीले गठन गरेको वार्ता टोलीले एकिकरण सम्बन्धि नीति तथा आधारलाई दुवै पार्टीले अनुमोदन पनि गरेको राप्रपा नेपालका सह–प्रवक्ता मोहन श्रेष्ठले जानकारी दिए ।

एकतापछि पार्टीको नाम राप्रपा मात्रै हुनेछ भने चुनाव चिन्ह राप्रपा नेपालको गाइ हुनेछ ।