बीबीसी । पुरातत्वविद्हरूले विश्वकै सबैभन्दा पुरानो बियर भट्टी फेला पारेका छन् । यो पाँच हजार वर्षअगाडिको भएको बताइएको छ । इजिप्सियन-अमेरिकन संयुक्त टोलीले मरुभूमिमा रहेको प्राचीन चिहानको मैदानमा यसको खोज गरेका हुन् ।
यसमा उनीहरूले बियर बनाउन अन्न र पानी मिसाइ तताउने ४० वटा भाँडा भेटाएका छन् । यो भट्टी राजा नरमरको पालाको भएको पुरातन वस्तुहरूको सर्वोच्च परिषद्ले जानकारी दिएको छ । परिषद्का अनुसार यो, ठूलो स्तरमा उत्पादन गरिने विश्वकै सबैभन्दा पुरानो बियर भट्टी हो ।
राजा नरमरले पाँच हजार वर्षअगाडि शासन गरेका थिए र इजिप्टलाई एकीकृत गर्ने काम पनि उनैले गरेको विश्वास गरिन्छ ।
यसमा झन्डै २० मिटर लामो आठवटा ठूला ठाउँ छन् जसमा प्रत्येकमा ४० वटा माटाका भाँडा दुईवटा लाइनमा राखिएको देख्न सकिन्छ । यस खोजका सह-प्रमुख म्याथ्यु एडम्सका अनुसार सो ठाउँ विशेष रुपमा चिहानघरमा हुने राजपरिवारको रितिरिवाजमा बियर आपूर्ति गर्न निर्माण गरिएको हुन सक्छ । त्यो समयमा यहाँ अत्यन्तै ठूलो स्तरमा, झन्डै २२ हजार चार सय लिटर बियर उत्पादन गर्ने गरिएको खोजकर्ताहरूको अनुमान छ । यसको उत्खननका क्रममा बलि संस्कृतिमा बियरको प्रयोग हुने गरेको प्रमाण फेला पारिएको थियो ।
एबिडोस ठाउँ प्राचीन इजिप्टको सबैभन्दा पुरानो सहरमध्येको एक हो जसमा थुप्रै घर, चिहान अनि मन्दिर छन् । अघिल्लो महिनामा मात्र एलेक्जेन्ड्रियाले त्यहाँ दुई हजार वर्षअगाडिका धेरै ‘मम्मी’हरू भेटाएका थिए जसको मुखभित्र सुनको जिब्रो थियो ।
