काठमाडौं । हिजो (सोमबार) निधन भएका डा. उपेन्द्र देवकोटालाई विभिन्न क्षेत्रका व्यक्तिहरुले बाँसबारीस्थित न्युरो अस्पतालमा पुगेर श्रद्धाञ्जली व्यक्त गरेका छन् । देवकोटालाई श्रद्धाञ्जली दिन उच्चपदस्थ व्यक्तिदेखि सर्वसाधारणको ठूलो भीड लागेको छ । डा. देवकोटाको इच्छाअनुसार नै उनको निधनपछि दौरा सुरुवाल, ढाका टोपी र कोट लगाइएको थियो । 

डा. देवकोटालाई श्रद्धाञ्जली दिन पुगेका सबै शुभेच्छुकका आँखा रसाएका थिए । शुभेच्छुककै भीडमा थिइन् तीन नम्बर प्रदेश प्रमुख अनुराधा कोइराला । उनी एउटा हातमा फूलको  गुच्छा बोकेर अर्को हातले साडीको सप्कोले आँखा पुच्दै उपेन्द्र देवकोटाको पार्थिव शरीर क्षेउमा पुगिन् । श्रद्धाञ्जली दिइन् र मिनेट मौन धारण गरिन् । त्यसपछि पनि उनका आँखामा आसु रोकिएन । देवकोटाको पार्थिव शरीर छेउमा उनकी श्रीमति डा. मधु र छोरीहरु मेधा, बसुधा र मञ्जरी थिए  । उनीहरुलाई अँगालो हालेर भक्कानिइन् कोइराला । 

धैरै समयसम्म पनि उनले आफ्नो आँशु रोक्न सकिनन् । उनले डा. देवकोटासँगका सम्झना सुनाइन्, “२००३ मा डा. देवकोटा र म एउटै मन्त्रीमण्डलमा थियौं । उहाँ र म स्वास्थ्यको वार्तामा सँगै बसेका थियौं  । उहाँ एकदम अनुशासित र कहिलै कसैलाई केही नभन्ने व्यक्ति हुनुहुन्थ्यो  । त्यहाँदेखि उहाँ र म  राम्रो साथी भएका थियौं । उहाँ र म सँगै बसेर स्वास्थ्य विमा कार्यक्रम ल्याउनुपर्छ भनेर विधेयकसमेत ल्याएका थियौं । उहाँजस्तो सर्जनको देशले खाँचो महसुस गरेको छ ।”

श्रद्धाञ्जलीका लागि पुगेका पूर्वप्रधानमन्त्री डा. बाबुराम भट्टराईले पनि आफ्ना सहपाठीलाई सम्झिए, “उहाँले र मैलै अस्कल क्याम्पसमा ८ वर्ष सँगै बिताएका थियौं ।”

अर्का पूर्वप्रधानमन्त्री लोकेन्द्रबहादुर चन्दले डा. उपेन्द्र देवकोटा स्वास्थ्यमन्त्री हुँदा आफ्नो पेसागत मात्र होइन, अन्य क्षेत्रमा पनि त्यति नै सक्रिय रहेको बताए । “उहाँले धैरै मानिसलाई नयाँ जीवन दिनुभयो तर उहाँलाई बचाउन सकेनौं ।”

वातावणमन्त्री लालबाबु पण्डितले नेपालका सक्रिय कुशल चिकित्सकले राष्ट्र निर्माणमा पुर्याएको योगदानलाई सम्झिनुपर्ने बताए । 

वरिष्ठ आँखा रोग विशेषज्ञ डा. सन्दुक रुइतले नेपाली हुँ भनेर देश र विदेशमा चिनाउन सक्ने शक्ति देवकोटामा भएको बताए । “उहाँ खोज गर्ने राम्रो सर्जन र राम्रो शिक्षक हुनुहुन्थ्यो । हामीले राम्रो चिकित्सक गुमाएका छौं,” उनले भने । 

स्वास्थ्य राज्यमन्त्री पद्मा अर्यालले देवकोटाको योगदानलाई प्रेरणाका रुपमा लिएर विभिन्न क्षेत्रको विज्ञ निर्माण गर्नका निम्ति ध्यान दिनुपर्ने बताइन् । 

डा. भगवान कोइरालाले डा. देवकोटाको न्युरो क्षेत्रमा विषेश योगदान रहेको बताए । “न्यूरो क्षेत्रमा नेपालमा विशेषज्ञ कम र भएका विशेषज्ञ पनि विदेश बस्ने प्रवृत्ति बढ्दो छ, तर उहाँ नेपालमा नै केही गर्नुपर्छ  भनेर यहीँ बस्नुभयो,” उनले भने । 

वरिष्ठ न्यूरो सर्जन डा. वसन्त पन्तले डा. देवकोटा एसियाकै अब्बल चिकित्सक रहेको र न्यूरो क्षेत्रमा उनको योगदान सधैं सम्झिइने बताए ।