काठमाडौं । हतियारसहित पक्राउ परेका गुण्डा नाइके गणेश लामा पुर्पक्षका लागि जेल चलान भएका छन् । सोमबार जिल्ला प्रशासन कार्यालय काठमाडौंको इजलाशले उनलाई जेल चलानको आदेश भएको हो ।

काठमाडौंका प्रजिअ केदारनाथ शर्माको इजलाशले जेल चलानको आदेश दिएपछि लामालाई आजै जेल लगिने तयारी भएको काठमाडौं प्रहरी परिसरका एसएसपी विश्वराज पोखरेलले जानकारी दिए । लामालाई डिल्लीबजार कारागार लैजाने तयारी भएको उनले बताए । लामाले अब फैसला नहुञ्जेलका लागि जेल बस्नुपर्ने हुन्छ । 

फागुन २९ गते राति काठमाडौंको पिंगलास्थानमा लामा पेस्तोल र गोलीसहित पक्राउ परेका थिए । प्रहरी प्रयोगशालाले पेस्तोल र पेस्तोलबाट निस्कीएको गोली लामाले नै चलाएको पुष्टि गरेको थियो । यद्यपि हतियार आफ्नो नभएको लामाले दाबी गर्दै आएका छन् ।

यसअघि सरकारी वकिलको कार्यालयमार्फत् लामामाथि दुईपटक म्याद थपेर प्रहरीले अनुसन्धान गरेको थियो । प्रहरीले लामासँग टाइप ५४ लेखिएको चाइनिज पेस्तोल र ६ राउन्ड गोली र एउटा खोका पनि घटनास्थलबाट बरामद गरेको थियो । 

फाइल तस्बिर