काठमाडौं ।  काठमाडौंको मातातिर्थमा प्रहरी र लुटेराबीच गोली हानाहान भएको छ । काठमाडौंबाट हेटौंडातर्फ जाँदै गरेको ना १ ज ३९४८ नम्बरको टाटा सुमो चेकजाँचका क्रममा लुटेरा गाडीबाट निस्किएर गोली हान्दै जंगलतर्फ भागेका थिए । काठमाडौंको चन्द्रागिरी ११ चिहानडाँडामा गोली हानाहान भएको हो ।  लुटेराले गाडीमा पैसा राख्ने ‘सेफ’ राखेर जाँदै गरेको अवस्थामा फेला परेको काठमाडौं प्रहरी प्रवक्ता एसपी प्रद्युम्न कार्कीले जानकारी दिए ।

चारजनाको समूहमा रहेका लुटेराले गाडी छाडेर जंगलतर्फ भागेको उनले जानकारी दिए ।  “चेकजाँचका क्रममा गाडीमा के छ भनेर सोध्दा पहिले विरामी भने,” प्रवक्ता कार्कीले भने,“तर सेफ देखिएपछि के हो भनेर सोध्दा सबै एकैपटक गाडीबाट ओर्लिएर गोली हान्दै जंगलतर्फ भागे ।” उनका अनुसार त्यसपछि प्रहरीले पनि दुई राउन्ड गोली हानेको थियो । अहिले जंगल क्षेत्रमा उनीहरुको खोजी भैरहेको उनले जानकारी दिए ।