काठमाडौं । चलचित्र ‘कुस्ती’को छायांकन सकिएको छ । । काठमाडौं तथा आसपासका क्षेत्रमा छायांकन गरिएको चलचित्रको ३९ औँ दिनमा इन्डक्ल्याप गरिएको हो ।  

गीतको छायांकन गर्न भने बाँकी रहेको निर्माता तथा निर्देशक अनिल योञ्जनले जानकारी दिए । फरक स्वभावका कारण एकसाथ रहन संघर्ष गर्न बाध्य जोडीको कथा यो चलचित्रले देखाउनेछ । छुट्टिएर बस्न नसक्ने र सँगै रहन पनि नसक्ने मनका भावनाहरूको कथा चलचित्रले उठान गर्ने निर्देशकले बताए ।

चलचित्रमा धीरज मगर, मिरुना मगर, पुस्कर गुरुङ, लुनिभा तुलाधर, भोलाराज सापकोटा, दीकिला शेर्पा, रवीन्द्र झा, पुस्कर गुरुङ, राजाराम पौडेल, किरण केसीलगायत कलाकारको अभिनय छ । 

एमटीभीको चर्चित भारतीय रियालिटी शो ‘स्प्लिट्सभिल्ला’ सिजन ५ बाट चिनिएकी दिकिला शेर्पाको यो डेब्यु नेपाली चलचित्र हो । 

उमंग शाहीको छायांकन, मित्रदेव गुरुङको सम्पादन रहने चलचित्र २०८२ को भदौमा प्रदर्शन हुनेछ ।