काठमाडौं । प्रधानमन्त्री केपी शर्मा ओलीले यही चैत १५ गते काठमाडौंको तीनकुनेमा भएको घटनाको निष्पक्ष छानबिन गरिने बताएका छन् । थाइल्यान्डको औपचारिक भ्रमण सकाएर शनिबार (चैत २३) स्वदेश फर्किएका उनले त्रिभुवन अन्तर्राष्ट्रिय विमानस्थलमा सञ्चारकर्मीसँग यस्तो बताएका हुन् ।

तीनकुने घटनाको न्यायिक छानबिन हुनुपर्छ भन्ने माग गरिँदै छ नि ? भन्ने सञ्चारकर्मीको प्रश्नमा उनले न्यायिक छानबिन हुन सक्ने र नहुन पनि सक्ने बताए । तीनकुने घटनाका निम्ति न्यायिक छानबिन गठन गर्ने कि नगर्ने भन्ने बारेमा विचार गरिने उनले उल्लेख गरे ।

प्रधानमन्त्री ओलीले भने, “... छानबिन निष्पक्ष हुन्छ । सबै कुरामा न्यायिक छानबिन नै चाहिन्छ भन्ने पनि छैन । त्यो हामी विचार गर्नेछौँ, यसै निष्पक्ष छानबिन गर्ने कि न्यायिक छानबिन गर्ने भनेर ।”

उनले सबै विषयमा न्यायिक छानबिन जरुरी नरहेको बताए । न्युज एजेन्सी नेपाल