काठमाडौं । दक्षिण कोरियाको संवैधानिक अदालतले राष्ट्रपति युन सुक योललाई महाभियोगमार्फत पदच्युत गर्ने संसद्को निर्णय शुक्रबार सदर गरेको छ । यो निर्णयसँगै योलको राष्ट्रपति पद तत्काल गुम्ने र उनले राष्ट्रपति भवन पनि खाली गनुपर्ने सीएनएनले जनाएको छ ।

यो फैसलामा संवैधानिक अदालतका सबै न्यायाधीशको सहमतिमा भएको बताइएको छ । दक्षिण कोरियाको टेलिभिजनसँग कुरा गर्दै संवैधानिक अदालतका कार्यवाहक प्रमुख मुन ह्युङ–बेले यो निर्णय सर्वसम्मत भएको बताए ।

 ̎राष्ट्रपति युन सुक योलको मार्सल ल लगाउने आदेश असंवैधानिक थियो । किनभने, त्यति बेला कुनै गम्भीर राष्ट्रिय संकट थिएन र उनले यो घोषणा गर्नुको कारण उचित भएको ठहर गर्न सकिन्न,̎ संवैधानिक अदालतका कार्यवाहक प्रमुख मुन ह्युङ–बेले भने ।

यो फैसलासँगै अब ६० दिनभित्र राष्ट्रपति निर्वाचन गराउनुपर्ने बताइएको छ  ।

यसैबीच, संवैधानिक अदालतले प्रधानमन्त्री हान डक–सुलाई कार्यवाहक राष्ट्रपतिका रूपमा पुनः नियुक्तिको आदेश गरेको छ ।