काठमाडौं । अमेरिकी राष्ट्रपति डोनाल्ड ट्रम्पले अन्तर्राष्ट्रिय व्यापारमा विभिन्न देशमाथि लगाइने नयाँ आयात शुल्क दर घोषणा गर्ने तयारी गरेका छन् । यसलाई ह्वाइट हाउसले 'मुक्ति दिवस'को संज्ञा दिएको छ ।

बीबीसीका अनुसार, राष्ट्रपति ट्रम्पले स्थानीय समयानुसार बुधबार अपराह्न ४ बजे ह्वाइट हाउसको रोज गार्डेनमा आयोजना हुने एक समारोहमा आयात शुल्क (ट्यारिफ) दर घोषणा गर्दै छन् । यस क्रममा उनले आयात शुल्कसम्बन्धी योजनाहरूको रूपरेखा प्रस्तुत गर्नेछन् ।

विश्वले नै ट्रम्पको यस कदमलाई चासोका साथ हेरिरहेको छ । तर, आयात शुल्क दर कति उच्च हुन सक्छ र कुनकुन देशप्रति लक्षित हुनेछ भन्ने विषय अझै स्पष्ट भएको छैन ।

ह्वाइट हाउसका अनुसार, ट्रम्प अन्तिम समयमा पनि विभिन्न देशसँग वार्ताका लागि खुला छन् । घोषणाको अघिल्लो दिन मंगलबारमात्र धेरै देशहरूले राष्ट्रपति ट्रम्पलाई सम्पर्क गरेको बताइएको छ ।

राष्ट्रपतिको रूपमा सपथ ग्रहणपछि ट्रम्पले आयात शुल्कका कारण अमेरिकी उत्पादनकर्तालाई मद्दत पुग्ने दाबी गर्दै आएका छन् । अमेरिकाले लगाउने आयात शुल्कले स्वदेशी उपभोक्तालाई अमेरिकी उत्पादन खरिद गर्न प्रोत्साहित गर्ने उनको धारणा छ ।

तर, विश्लेषकहरू ट्रम्पको यस कदमले व्यापक मूल्यवृद्धि गराउन सक्ने बताउँछन् । साथै, यसले अन्तर्राष्ट्रिय व्यापार युद्ध सुरु गर्न सक्ने उनीहरूको चेतावनी छ ।

यसैबीच, युरोपियन युनियनले अमेरिकी कदमको जवाफी कारबाही गर्ने घोषणा गरेको छ । 

राष्ट्रपति ट्रम्प भने पारस्परिक आयात शुल्क लगाउनुको पछाडि अमेरिकाविरुद्ध अन्य देशले अन्तर्राष्ट्रिय व्यापारमा गरेको अनुचित वा अन्यायपूर्ण व्यवहार भएको बताउँछन् । केही देशले अमेरिकी सामानमा लगाउने आयात शुल्क अमेरिकाले ती देशहरूबाट आयात हुने सामानमा लगाउनेभन्दा धेरै रहेको उनको भनाइ छ ।

यसअघि, सोमबार ह्वाइट हाउसकी प्रेस सचिव क्यारोलिन लेभिटले पत्रकार सम्मेलन गर्दै भारत, युरोपियन युनियन, जापान, क्यानडालगायत देशहरूले अमेरिकी वस्तुहरूमा अत्यधिक कर लगाएर अनुचित व्यापारिक अभ्यास गरेको आरोप लगाएकी थिइन् । परिणामस्वरूप अमेरिका ती देशलाई पारस्परिक शुल्क लगाउने बाध्य भएको उनको भनाइ थियो ।