काठमाडौं । राजावादी आन्दोनलका कमान्डर दुर्गा प्रसाईंलाई सरकारले अझै पक्राउ गर्न सकेको छैन । २१ घण्टा बिते पनि प्रसाईंलाई सरकारले पक्राउ गर्न सकेको छैन । 

मोबाइल स्वीचअफ गरेर फरार भएका प्रसाईंको अन्तिम लोकेसन पत्ता लगाए पनि प्रहरीले उनलाई दिउँसो १ बजेसम्म पक्राउ गर्न नसकेको बताएको छ । 

प्रहरीका अनुसार उनको अन्तिम लोकेसन ललितपुरको भैंसेपाटी देखिएको छ ।     

जिल्ला प्रहरी परिसर ललितपुरका एसपी नरहरी रेग्मीका अनुसार प्रसाईं हिजो साँझसम्म धर्मगुरु पुस्कर खतिवडाको घरमा थिए । त्यहाँबाट निस्किएका उनलाई प्रहरीले पक्राउ गर्न सकेको छैन । 

प्रसाईंलाई पक्राउ गर्न जिल्ला प्रहरी परिसर काठमाडौं र उपत्यका अपराध अनुसन्धान कार्यालयको विशेष टोली खटिएको छ । गृहमन्त्री रमेश लेखकले पनि प्रसाईं छिट्टै पक्राउ पर्ने बताएका छन् ।

राप्रपाका नेताद्वय रवीन्द्र मिश्र र धवलशमशेर जबरा तथा स्वागत नेपाल भने पक्राउ परिसकेका छन् । शुक्रबार काठमाडौंको तीनकुनेमा उपस्थित भएर हिंसात्मक आन्दोलन गरेको आरोपमा उनीहरू पक्राउ परेका हुन् । 

राजसंस्था पुनःस्थापना संघर्ष समितिका संयोजक नवराज सुवेदीलाई घरमै नजरबन्दमा राखिएको छ ।