काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले कुलमान घिसिङलाई पदमुक्त गर्ने सरकारको निर्णयले कर्मचारीहरू राजनीतिक स्वार्थको लागि राष्ट्रसेवकभन्दा सरकार र पार्टीको नोकर हुने खतरा बढेको बताएका छन् ।

बिहीबार संसद् भवन परिसर नयाँ बानेश्वरमा सञ्चारर्कीहरूसँग कुराकानी गर्दै अध्यक्ष लिङदेनले यस्तो बताएका हुन् । उनले आफ्नो कार्यकालको केही समय मात्र बिताउन बाँकी रहेका कुलमानलाई सम्मानजनक बिदाइ गर्नुपर्ने ठाउँमा अपमानजनक रूपले निष्कासन गरेर सरकारले गलत नजिर स्थापित गरेको जिकिर गरे ।

"पहिलो कुरा त सरकारले जे निर्णय गर्यो त्यो गलत गर्‍यो । कति मानिसहरूले सरकारले आफ्नो कर्मचारीलाई निकाल्न पनि सक्छ, राख्न पनि सक्छ यो सामान्य प्रक्रिया हो भनेर व्याख्या गरिरहेका छन् । तर, एउटा कुशल प्रशासकको रूपमा स्थापित कुलमान घिसिङ जसले आफ्नो कार्यकालको थोरै मात्र समय व्यतित गर्न बाँकी थियो । उसलाई सम्मानजनक बिदाइ गर्नुपर्ने ठाउँमा जुन अपमान जनक ढंगले निष्कासन गरियो," उनले भने ।

उनले उत्कृष्ट प्रशासकको छवि बनाएका कर्मचारीलाई हटाउँदा अगामी दिनमा समेत सरकारले स्वार्थअनुकूल कर्मचारीहरू हटाउने र राख्ने कार्य गर्ने उनको भनाइ छ । कमजोर कर्मचारी प्रशासनलाई ध्वस्त पार्ने काम गरेको भन्दै सरकारले निर्णय सच्याउनुपर्ने जिकिर गरे ।

"त्यसले एउटा नजिर खडा हुने खतरा भयो कि सरकारले चाह्यो भने कर्मचारीहरूलाई जुनसुकै बेला निकाल्न सक्छ । यसले कर्मचारी राष्ट्रसेवकभन्दा पनि कहिलेकाही राजनीतिक स्वार्थको लागि सरकार र पार्टीको नोकरमा परिणत हुने खतरा भयो । र अरुले पनि यसलाई नजिर बनाएर पहिले पनि यसरी निकालिएको थियो निकाल्न पाइन्छ भन्ने बाटोतर्फ देश गयो भने कर्मचारी संयन्त्र कर्मचारी प्रशासन त्यसै त कमजोर भएको छ त्यो ध्वस्त हुनसक्छ," उनले भने । 

अध्यक्ष लिङदेनले प्रतिपक्षी दलहरूले सदनमा प्रधानमन्त्रीले चित्तबुझ्दो जवाफ मागिरहेको र जवाफ नदिएसम्म संसद् चल्न नदिने अडान कायमै रहेको बताए । प्रधानमन्त्रीले सदनमा जवाफ दिनुको सट्टा संसद् बाहिर प्रतिपक्षी दलहरूलाई अपमानित गर्ने गरी दिएको जवाफ खेदजनक रहेको समेत बताए ।