काठमाडौं । नेपाल विद्युत् प्राधिकरणका नवनियुक्त कार्यकारी निर्देशकमा हितेन्द्रदेव शाक्यले पदभार सम्हालेका छन् । शाक्यले प्राधिकरणको केन्द्रीय कार्यालय रत्नपार्कमा पुगेर आफ्नो कार्यभार सम्हालेका हुन् ।

कुलमान घिसिङलाई बर्खास्त गर्दै सरकारले उनलाई दोस्रोपटकका लागि कार्यकारी निर्देशकमा नियुक्त गरेको थियो । सरकारको पत्र प्राप्त भएपछि उनले मंगलबार प्राधिकरण केन्द्रीय कार्यालयमा गएर पदभार ग्रहण गरेका हुन्  ।

कार्यकारी निर्देशक शाक्यलाई प्राधिकरणका कर्मचारीले स्वागत गरेका थिए । आफूले अगाडि गर्न खोजेका कामहरू अब पूरा गर्ने उनले बताए । कार्यभार सम्हाल्दै उनले प्राधिकरणको नेतृत्वको लागि ठूलो चुनौती भएको र यो चुनौती पूरा गर्न आफू तयार रहेको बताए । टिमको रूपमा व्यक्तिलाई भन्दा पनि संस्थालाई महत्त्व दिँदै अगाडि बढ्ने उनको भनाइ छ ।

लोडसेडिङको विषयमा पत्रकारले सोधेको प्रश्नमा लोडसेडिङ नहुने बताए । अब लोडसेडिङभन्दा पनि पर्याप्त बिजुली उपलब्ध हुने उनले जनाए ।

डेडिकेटेड तथा ट्रंकलाइन विवाद कसरी समाधान गर्ने भन्ने पत्रकारको प्रश्नमा अर्धन्यायिक निकायबाट त्यसको समाधान आइसकेको र कार्यान्वयन गर्न मात्र बाँकी रहेको बताए ।

आफू प्राविधिक भएको र त्यसलाई प्राविधिक रूपमा समाधान निकाल्ने उनले बताए ।