काठमाडौं । प्रधानमन्त्री केपी शर्मा ओलीले लिपुलेक, लिम्पियाधुरा र कालापानीका विषयमा सांसदले उठाएको प्रश्नको जवाफ दिएका छन् । बिहीबार प्रतिनिधिसभाको बैठकमा राष्ट्रिय प्रजातन्त्र पार्टी (राप्रपा)का सांसद बुद्धिमान तामाङले प्रधानमन्त्री ओलीलाई चुच्चे नक्सामा समेटिएका भूभागको भ्रमण गर्न सुझाव दिएका थिए ।

“नेपालको चुच्चे नक्सामा समेटिएको लिपुलेक, कालापानी र लिम्पियाधुराको भ्रमणमा प्रधानमन्त्रीज्यू कहिले जानुहुन्छ ? भ्रमणको कुनै कार्यक्रम बनेको छ कि छैन ?,” उनले सोधेका थिए ।

जवाफमा ओलीले सन् १९६२ मा नेपालको चुच्चे नक्साको चुच्चो हराएको बताए । उनले तत्कालीन सरकारबारे सबैलाई जानकारी रहेको पनि बताए ।

“हामी सबैलाई थाहा छ, सन् १९६२ सम्म हाल नेपालको नक्सा जुन हामीले बनाएको छौँ, हाम्रो संसद्ले संविधानको अंग बनाएको छ । त्यो नै यथार्थ छ,” प्रधानमन्त्रीले भने, “सन् १९६२ सम्म यो भूभाग नेपालकै अधिनमा थियो । र, नेपालको नक्सा पनि तदनुरुप नै थियो । त्यसपछि नेपालको नक्सा किन फेरियो,  कसले फेर्‍यो, कसको सरकार थियो, कस्तो व्यवस्था थियो माननीयज्यूलाई याद होला भन्ने विश्वास गर्छु ।”

उनले विसं ०७७ सालको असार ४ मा संविधानको दोस्रो संशोधनमार्फत सर्वसम्मतरूपमा संविधानको अंग बनाइएको बताए ।