काठमाडौं । राष्ट्रिय स्वतन्त्र पार्टी कोशी प्रदेश समितिले सो पार्टीका सुनसरी जिल्ला समितिका सभापति जीवनकुमार श्रेष्ठलाई स्पष्टीकरण सोधेको छ । 

गत आइतबार कोशी प्रदेशको आधिकारिक ह्वाट्सएम ग्रुपमा एक प्रदेश समिति सदस्यले ४ गतेको बैठक ८ गते सरेको विषयमा जिज्ञासा राख्दा श्रेष्ठले ‘यहाँ जे पनि हुन सक्छ यो कम्पनी हो, पार्टी हैन’ भन्ने जवाफ दिएका थिए । 

देशकै चौथो ठूलो राष्ट्रिय पार्टीलाई कम्पनी भन्नु पार्टी विधान २०७४ (तेस्रो संशोधन)को धारा २८ को ३ को (छ) को ४ बमोजिम पार्टी, मुलुक र जनताको हितविपरीत रहेको भन्दै कोशी प्रदेश समितिकी कार्यवाहक सभापति गोमा तामाङ (शरिन)ले श्रेष्ठलाई स्पष्टीकरण सोधेकी हुन् । 

‘पार्टीको नीति, उद्देश्य र कार्यक्रम विपरीत पार्टी सदस्यलाई नैरश्य बढाउने गतिविधिमा लाग्नुभएकाले यहाँलाई पार्टीले जिल्ला सभापति नरहने गरी कारबाही किन नगर्ने ? २४ घण्टाभित्रमा लिखित स्पष्टीकरण पेस गर्न हुन अनुरोध छ,’ पत्रमा भनिएको छ । 

समय सीमाभित्र स्पष्टीकरण प्राप्त नभएमा श्रेष्ठ पार्टी गतिविधिविपरीत लागेको स्वीकारेको ठानी पार्टी विधानबमोजिम कारबाही गरिने पत्रमा उल्लेख छ ।

उक्त पत्रको बोधार्थ केन्द्रीय अनुशासन आयोग काठमाडौं, केन्द्रीय संगठन विभाग काठमाडौं र प्रदेश समिति, कोशीलाई दिइएको छ ।