काठमाडौं । सिनेमा ‘आउट ल : दफा २१९’ पनि चलचित्र केन्द्रीय जाँच पास समिति (सेन्सर बोर्ड)मा अड्किएको छ । बोर्डले बुँदागत रूपमा हटाउनुपर्ने सिन माइनुट गरेर निर्माणपक्षलाई दिएको छ । 

अब उक्त सिन हटाएपछि मात्रै यो चलचित्रको जाँचपास हुनेछ । बिहीबार रिलिज हुने चलचित्र आजसम्म पनि सेन्सरबाट पास भएको छैन । आज सेन्सर पास नभए यो चलचित्र रिलिज हुने छैन । 

सिनेमा हलहरूले पनि शो बाँडफाँट गरेर अग्रिम टिकट बिक्री सुरु गरिसकेका छन् । 

एक्सन सिनेमा ‘आउट ल : दफा २१९’मा एउटा सिन ५० लाख रुपैयाँको रहेको भन्दै निर्माणपक्षले प्रचार गरेको थियो । उक्त सिनमा सेन्सरले आपत्ति जनाएपछि सेन्सर पास हुन ढिलो भएको भन्ने प्रचार भइरहेको छ । 

“त्यो सिनमा सेन्सरको आपत्ति छैन । त्यो सिन पूरै काटिएको भन्ने कुरा पनि सत्य होइन,” सेन्सर बोर्डका एक सदस्यले बाह्रखरीसँग भने, “त्यो सिनभित्रको केही सटमा कमेन्ट हुनसक्छ । तर, त्यो सिन नै हटाउन हामीले भनेका छैनौँ ।” 

‘आउट ल : दफा २१९’मा अभिनेता सुशील श्रेष्ठ मुख्य भूमिकामा छन् । सुशीलको यो पाँच वर्षपछि आउने लागेको चलचित्र हो । 

विक्की महर्जनको लेखन तथा निर्देशनमा निर्माण भएको चलचित्रमा सुशीलसँगै नरेश पौडेल, शिक्षा संग्रौला, सुमन भण्डारी, हेम गुरुङ, सोनी लागुनलगायतको पनि अभिनय छ । 

अमित अग्रहरिको निर्माण रहेको चलचित्रको कार्यकारी निर्मातामा विनोद कडायत र सशांक खड्का तथा विकास चौधरी सह–निर्माता हुन् । 

नवीन गुरुङको डीओपी रहेको चलचित्रमा ट्रेलर मास्टर साहिल खानको सम्पादन रहेको छ ।

यसैबीच, चैत १ गतेबाट प्रदर्शनमा आउने ‘राजागंज’ पनि सेन्सरमा रोकिएको छ । चलचित्रमा ‘कुहिएको आँप’ भन्ने शब्द प्रयोग भएपछि सेन्सरले आपत्ति जनाउँदै दुईपटकसम्म रोकेको छ । 

बुधबार दोस्रोपटक सेन्सरका लागि निर्माता र निर्देशक सेन्सर गराउन गए पनि सेन्सरले सच्याउन आग्रह गरेका सिन यथावत रहेको पाइएपछि सेन्सर पासको सर्टिफिकेट दिन नसकिएको सेन्सर बोर्डका एक सदस्यले जानकारी दिए । 

‘कुहिएको आँप’ भन्ने शब्द हटाउन सेन्सरले सुझाएपछि निर्माणपक्षले चलचित्रको मर्म नै मर्ने भन्दै नहटाउने अडान लिएको थियो । तर, सेन्सरले राख्ने भए प्रधानमन्त्रीको कार्यालयबाट अनुमतिसहितको पत्र लिएर आउन भनेको स्रोतको भनाइ छ । 

दीपक रौनियारले निर्देशन गरेको चलचित्रले मधेस आन्दोलनको समय अपरहणमा परेको दुई बच्चा छुटाउन प्रहरीले गरेको प्रयासलाई मुख्य कथा बनाएको छ । 

चलचित्रमा आशा मगराती, दयाहाङ राई, विजय बराल, ऋचा शर्मालगायत कलाकार मुख्य भूमिकामा छन् । ‘राजागंज’ विश्वका ठूला फिल्म फेस्टिभलमा पुगेर नेपालमा प्रदर्शन हुन लागेको चलचित्र हो ।