विराटनगर । नेकपा एमाले मोरङको निर्वाचन बुधबार बिहानलाई सारिएको छ ।‌ मंगलबार दिनभर मतदान गर्ने पर्खाइमा बसेका प्रतिनिधि साँझ होटेल र बासको प्रबन्ध गरिएको स्थानमा फर्किएका छन् ।

निर्वाचन समितिले उमेदवारको अन्तिम नामावली प्रकाशन गरेर मतदान कार्यतालिकाको सूचना टाँस गरेको छ । तर, चुनावी प्रक्रिया बुधबार बिहान ७ बजेदेखि सुरु हुनेमा प्रतिनिधिहरू अझै सशंकित छन् ।  

अधिवेशन स्थलमा भेटिएका एकजना इतर समूहका प्रतिनिधिले भने, "मतदान हुँदा संस्थापन हार्ने देखिएपछि गलाउने र फकाउने रणनीति तयार गरी निर्वाचन धकेलिएको हो । एमाले कोसी प्रदेश अधिवेशनमा पनि यस्तै गरिएको थियो ।"

संस्थापन समूहले आफू पक्षका अध्यक्ष बनाएर बाँकी मिलाउने र सहमतिमा सर्वसम्मत कार्यसमिति ल्याउने भन्दै निर्वाचन गर्न रोकेको इतर समूहका एक उमेदवारले बताए । यही प्रश्न सोध्दा संस्थापनबाट अध्यक्षका उमेदवार राजकुमार ओझाले आफूहरू सहमतिको विरोधी नभएको बताए । "नमिल्दा चुनावी प्रतिस्पर्धामा जाने लोकतान्त्रिक विधि त छँदैछ," उनले भने ।

एमाले अध्यक्ष केपी ओलीले ओझालाई अध्यक्ष बनाउन चाहेका छन् । त्यही भएर पनि छलफल र सहमतिका नाममा मतदान सारिएको चर्चा एमालेमा छ । मंगलबार दिनभर यही विषयमा नेताबीच छलफल भएको थियो ।

शनिबार सुरु भएको एमाले मोरङको दशौँ अधिवेशनबाट सर्वसम्मत नेतृत्व चयन हुन नसकेपछि सोमबार निर्वाचन कार्यतालिका प्रकाशन गरिएको थियो । तर, निर्वाचन गर्ने समय टुंगो नलाग्दा प्रतिनिधिहरू अधिवेशन स्थलमा आउने, गफिने र नाचगान गरी‌ फर्कने गर्न‌ थालेका छन् । उमेदवारहरू समूह बनाएर मत माग्न व्यस्त भए पनि मत हाल्ने प्रतिनिधिमा उत्साह देखिएको थिएन । मंगलबार पनि चुनाव नहुने चर्चाबीच कतिपय प्रतिनिधि दिउँसै आफू बसिरहेको होटेलतिर फर्किएका थिए ।

प्रमुख निर्वाचन अधिकृत सुरेशलाल श्रेष्ठले निर्वाचनको प्रक्रिया जारी रहेको बताउँदै मतदानको समय टुंगो लागेको बताए । ूउमेदवारको अन्तिम नामावली प्रकाशन गरिएको छ । अब कार्यतालिकाअनुसार नै प्रक्रिया अघि बढ्छ । मतदान गराउन हामी तयार छौँ, उनले भने ।

निर्वाचन समितिले मंगलबार बिहान ९ बजेलाई मतदानको समय तोकेर फेरि तीन घण्टा पछि सारेको थियो ।

अधिवेशनले १६५ सदस्यीय नयाँ नेतृत्व चयन गर्नेछ ।  अधिवेशनमा ९१४ प्रतिनिधि छनोट भएका छन् ।‌ नेतृत्वमा पुग्न संस्थापन र इतर समूहले प्यानल बनाएर चुनावी प्रतिस्पर्धामा उत्रिएका छन् । अन्तिम नामावलीअनुसार पाँचजना पदाधिकारीसहित १६५ सदस्यीय जिल्ला समितिमा ७१ जना सदस्य सर्वसम्मत निर्वाचित भएका छन् ।

३२५ जनाले मनोनयन दर्ता गरेका थिए । तीमध्ये ६३ जनाले उमेदवारी फिर्ता लिएका छन् । चुनावी मैदानमा १९१ जना छन् ।

इतर समुहका उपाध्यक्षका उमेदवार सागर थापाले समय सारिरहँदा प्रतिनिधिलाई दिक्दारी भएको सुनाए ।

अधिवेशनमा संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रवीन थापा, उपसचिवमा शिल्पा निराला कार्की र ईजालाल राजवंशीले उमेदवारी दिएका छन् । यस्तै, इतर समूहबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष बान्तवा र उषा झाले उमेदवारी दिएका छन् ।