काठमाडौं । नेपाली कांग्रेसका सांसद डा. उदयशमशेर जबराले सहकारी संस्थाको समस्याका कारण नेपाल ‘ग्रे लिस्ट’मा परेको बताएका छन् । मंगलबार (फागुन १३) प्रतिनिधिसभा बैठकमा उनले यस्तो बताएका हुन् ।

फाइनान्सियल एक्सन टास्क फोर्सले नेपाललाई ग्रे लिस्टमा राखेको उनले उल्लेख गरे । नेपाललाई ग्रे लिस्टमा राख्नुको मुख्य कारण सहकारी रहेको उनले जिकिर गरे । “फाइनान्सियल एक्सन टास्क फोर्सले नेपाललाई ग्रे लिस्टमा राखेको छ । विशेष गरेर मनी लाउन्डरिङ र सम्पत्ति शुद्धीकरणको विषयकेन्द्रित हो,” उनले भने, “नेपाललाई ग्रे लिस्टमा राखेको मुख्य कारण सहकारीको कारण हो ।”

उनले सहकारीमा कोही व्यक्तिले जम्मा गरेको पैसाको स्रोत नखोजिने कारण पनि समस्या बढेको बताए । “सहकारीमा कोही व्यक्तिले जम्मा गरेको पैसाको स्रोत कहाँबाट आयो भन्ने खोजिँदैन । त्यसैले अब यो सरकारले हाम्रो सहकारीलाई नियमन गर्नको निम्ति पनि क्षमता बढाउनुपरेको छ,” उनले भने, “अहिले हामीले नेपालमा बैंकलाई कसी गर्ने र सहकारीलाई खुला गर्ने गर्दा पनि यो समस्या आएको हो ।”

उनले सहकारीलाई नियमन गर्न सरकारले क्षमता बढाउन जरुरी रहेको औँल्याए । न्युज एजेन्सी नेपाल