काठमाडौं । नेपालमा रााष्ट्रिय डोरीतान प्रतियोगिता आयोजना हुने भएको छ । नेपाल डोरीतान संघले प्रतियोगिता आयोजना गर्न लागेको हो । सोमबार आयोजक नेपाल डोरीतान संघले पत्रकार सम्मेलन गरी प्रतियोगिताबारे जानकारी दिएको हो ।

आयोजकका अनुसार मंगलबारदेखि सानोठिमीस्थित एसोएस हर्मन माइनर स्कुलमा सुरु हुनेछ । दुई दिनसम्म प्रतियोगिता सञ्चालन हुनेछ । महिला र पुरुष गरी दुई विधामा प्रतिस्पर्धा हुने आयोजकले जनाएको छ । महिलातर्फ वाग्मती, कोसी, मधेस, लुम्बिनी, गण्डकी प्रदेशबाट एक–एक टिम र आर्मी, पुलिस र सशस्त्र प्रहरी बल गरी आठ टोलीले सहभागिता जनाउनेछन् । त्यस्तै, पुरुषतर्फ प्रत्येक प्रदेशबाट एक–एक टिम तथा विभागीय टिम गरी १० वटा टोली सहभागी हुने जनाइएको छ ।

प्रतियोगितामा पुरुषतर्फ प्रथम हुनेले एक लाख रुपैयाँ तथा दोस्रो हुनेलाई ५० हजार रुपैयाँका साथै शिल्ड, मेडल र प्रमाणपत्र प्राप्त गर्नेछन् । महिलातर्फ विजेतालाई नगद ६० हजार र उपविजेतालाई ४० हजार रुपैयाँका साथै मेडल, शिल्ड र प्रमाणपत्र दिइने छ ।

पुरुष टिममा ६४० किलो र महिलातर्फ ५८० किलो तौल नकट्ने गरी बढीमा आठजनासम्म खेलाडी राख्न पाउने छन् । कुल ३१ लाख अनुमानित बजेटमा सञ्चालन हुने खेलमा १६२ खेलाडी सामेल हुने बताइएको छ ।