काठमाडौं । भारतीय क्रिकेट टिमका शीर्षक्रम ब्याटर विराट कोहली एकदिवसीय अन्तर्राष्ट्रिय क्रिकेटमा सबैभन्दा छिटो १४ हजार रन बनाउने ब्याटर बनेका छन् ।

आईसीसी च्याम्पियन्स ट्रफी–२०२५ अन्तर्गत आइतबार पाकिस्तानविरुद्ध १०० रनको शतकीय इनिङसँगै विराटले आफ्नै देशका पूर्वब्याटर सचिन तेन्दुल्करलाई पछि पार्दै यो कीर्तिमान बनाएका हुन् । एकदिवसीय अन्तर्राष्ट्रिय क्रिकेटमा कोहलीको यो ५१औँ शतक हो ।

कोहलीले भारतबाट २८७ इनिङमै १४ हजार रन पूरा गरेका हुन् । यसअघि ३५० इनिङमा १४ हजार पूरा गर्दै सचिन तेन्दुल्कर सबैभन्दा छिटो यो कीर्तिमान बनाउने खेलाडी बनेका थिए । यो सूचीको तेस्रो स्थानमा रहेका श्रीलंकन ब्याटर कुमार संगकाराले ३७८ इनिङमा १४ हजार पूरा गरेका थिए ।