काठमाडौं । राष्ट्रिय प्रजातन्त्र पार्टी (राप्रपा)का सांसद ज्ञानबहादुर (ज्ञानेन्द्र) शाहीले आफूले सामाजिक सञ्जालमा लेखेको विषयलाई दिएर खेद प्रस्ताव पारित गर्नु अभिव्यक्ति स्वतन्त्रताविपरीत भएको टिप्पणी गरेका छन् ।

सोमबार संसद् भवन परिसर नयाँ बानेश्वरमा सञ्चारकर्मीसँग कुरा गर्दै सांसद शाहीले अभिव्यक्ति स्वतन्त्रतालाई संकुचित गर्नेगरि आफ्नो अभिव्यक्तिप्रति राष्ट्रियसभाले खेद प्रस्ताव पारित गरेको भन्दै आपत्ति समेत जनाए ।

यसअघि राष्ट्रियसभामा विधेयकहरूको छलफल सदस्यहरूले नबुझेको देखिएकाले थप अध्ययन गर्नका लागि आफूले सुझाव मात्र दिएको उनले बताए ।

आफू कुनै नेताको निगाहामा नभइ जनताबाट मत ल्याएर संसद्मा आएको भन्दै जनताको मतको अपमान गर्ने काम समेत राष्ट्रियसभाले गरेको धारणा राखे ।

यसअघि आइतबार बसेको राष्ट्रियसभा बैठकले प्रतिनिधिसभा सदस्य शाहीले राष्ट्रियसभा नै वृद्धाश्रम भएको टिप्पणी गरेको भन्दै खेद प्रस्ताव पारित गरेको थियो ।