काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सशस्त्र संघर्षको परिणामले देश संघीय लोकतान्त्रिक गणतन्त्रमा रहेको बताएका छन् ।

धुर्कोट गाउँपालिमा सहिद उद्यानको उद्घाटन गर्दै प्रचण्डले सशस्त्र संघर्ष, जनआन्दोलन र अन्य बलिदानका कारण नै अहिले गाउँगाउँसम्म सरकार बन्न र जनताका अधिकार स्थापित हुन सफल भएको बताए ।

“यो सामान्य सुधारात्मक परिवर्तन मात्रै होइन, गुणात्मक, युगान्तकारी र धेरै समयसम्म टिक्ने परिवर्तन हो,” प्रचण्डले भने, “संविधानले पहिलोपटक नेपाली जनतालाई सार्वभौम सम्पन्न बनाएको छ ।” संविधानमा जनताका अधिकार स्थापित भए पनि जनताको घरआँगनमा भने सोचेजस्तो खुसियाली नआएको उनको भनाइ थियो ।

आफू प्रधानमन्त्री हुँदा मदन भण्डारी राजमार्ग, मध्यपहाडी लोकमार्ग, सालझण्डी ढोरपाटन सडकलगायत काम गरेको अध्यक्ष दाहालले उल्लेख गरे ।