काठमाडौं । भूमि व्यवस्था, सहकारी तथा गरिबी निवरणमन्त्री बलराम अधिकारीले अध्यादेशको बारेमा अध्ययन गरेर मात्रै बोल्न चेतावनी दिएका छन् ।

बुधबार नेपाल निजामती कर्मचारी संगठनको १२औँ महाधिवेशन समारोहलाई सम्बोधन गर्दै उनले यस्तो बताएका हुन् । । उनले भूमिसम्बन्धी अहिले विभिन्न भ्रम फैल्याइएको बताए । बुझ्दै नबुझी, हेर्दै नहेरी अध्यादेशलाई खण्डन गर्ने काम भएको भन्दै आपत्ति जनाए । उनले पहिला अध्यादेशमा के छ भन्नेकुरा पढ्न र बाहिर बोल्न नेता र कानुनविद्हरूलाई आग्रह गरे । कुनै हानि नगर्ने भन्दै अध्यादेशको बारेमा बहस गर्न पनि आफू तयार रहेको बताए । अध्यादेशहरू संसद्‌बाट पारित हुने पनि दाबी गरे ।

उनले भने, "भूमिसम्बन्धी अहिले विविधखाले हल्लाहरू गरिएको छ । हाम्रो देशको सन्दर्भमा धेरैखाले भूमिका अवस्थाहरू छन् । कतिपय बुझ्दै नबुझी, हेर्दै नहेरी अध्यादेशलाई खण्डन गर्ने काम गरिएको छ । मैले कानुनविद्हरूलाई पनि भनेँ, राजनीतिक नेताहरूलाई पनि भनेको छु । पहिला अध्यादेशमा के छ ? पढ्नुपर्‍यो । त्यसपछि बल्ल बाहिर बोल्नुपर्‍यो । होइन भने हामीसँग बहस गर्नुपर्‍यो । हामी बहस गर्न तयार छौँ । र यी अध्यादेशहरू पास हुनेछन् ।"

मन्त्री अधिकारीले सहकारीप्रति गलत भाष्य सिर्जना गरिएको बताए ।