पोखरा । बागलुङको ढोरपाटन नगरपालिकाका मेयर समेत रहेका देवकुमार नेपाली गएको असोज १५ देखि पुर्पक्षका लागि थुनामा छन् । पोखरा र बागलुङमा सञ्चालित इमेज बचत तथा ऋण सहकारी संस्थाको अर्बौं ठगेको आरोपमा अदालतको आदेशबाट थुनामा गएका हुन् । उनलाई सरकारी वकिल कार्यालयले सोमबार उपस्थित गराउन पत्र काटेको थियो । फर्कने क्रममा नेताले जस्तै भाषण गरे । उक्त भाषणलाई प्रहरीले नजरअन्दाज गरे । मुकदर्शक भएर हेरेर बसिरहे ।  

कारागार ऐन–२०७९ को दफा १७ मा भेटघाटका लागि नातेदार र नजिकका आफन्त तथा थुनुवाले तोकेका कानुन व्यवसायीलाई विशेष सुरक्षा व्यवस्था गरेर कारागार प्रशासनले कारागारभित्रै भेट्न व्यवस्था मिलाउन पाउने व्यवस्था गरेको छ । त्यसबाहेक भेट्न आउनेहरूले पनि तोकिएको सुरक्षा व्यवस्था र सर्त पालना गर्नुपर्ने उल्लेख छ ।

दफा १८ को उपदफा ५ मा विशेष भेटघाट भए पनि प्रमुख जिल्ला अधिकारीलाई जानकारी गराउनुपर्ने उल्लेख छ ।

सार्वजनिक स्थानमा कुनै पनि थुनामा रहेका बन्दीले भाषण गर्न पाउँदैनन् । तर, सोमबार भने जिल्ला प्रहरी कार्यालय बागलुङका प्रहरी प्रमुख ऋषिराम कँडेलकै अगाडि नेपालीले सार्वजनिक स्थानमा भाषण गरे । बागलुङ र पोखरामा सञ्चालित इमेज बचत तथा ऋण सहकारी संस्था ठगी प्रकरणमा बागलुङ अदालतले कारागार पठाएका नेपालीले भने स्वयं प्रहरी प्रमुख कँडेलकै अगाडि नेताको शैलीमा हात हल्लाउँदै भाषण गरे ।

देवकुमारले भाषण गरिरहँदा कँडेल भने उनको बडिगार्डझैँ उभिएको भिडियो हाल सामाजिक सञ्जालमा भाइरल छ ।

सोमबार देवकुमार नेपालीलाई जिल्ला सरकारी वकिलको कार्यालय बागलुङले कारागारलाई पत्र पठाउँदै नेपालीलाई उपस्थित गराउन भनेको थियो । बाक्लो सुरक्षाकर्मीका बीच उनलाई सरकारी वकिलको कार्यालय पनि लगियो ।

जब, त्यहाँबाट नेपाली निस्के, उनले बचतकर्ताका अगाडि भाषण गरे । कसैको कुरा नसुन्न भने ।

“तपाईंहरू ढुक्क हुनुहोस् । मेरो समस्या अप्ठ्यारो भएका कारणले बाहिर जान परेको हो । दाजुभाइ दिदीबहिनीहरूको बचतको सबै जिम्मा मैले लिएको छु । साना बचतकर्तालाई पैसा, ठूला बचतकर्तालाई जग्गाको व्यवस्थापन हुँदैछ । यसको नेतृत्व डिलबहादुर दाई र लोकेन्द्र भाइले गर्नुभएको छ,” उनले बचतकर्तालाई आश्वासन दिए ।

बचतकर्ताको रकम जसरी पनि फिर्ता दिने उनले दोहोर्‍याए । “तपाईंहरू ढुक्क हुनुहोस्, जे कुरा भए पनि अरुको कुरा सुन्ने होइन । हामीले दिने हो तपाईंले लिने हो । जसरी इमेजमा बचत गर्नुभएको थियो, संस्थापक अध्यक्षको हैसियतले मैले जिम्मा लिएको छु,” नेपालीले भने, “म सुकुम्बासी भएर पनि तपाईंहरू हजारौँलाई म सुकुम्बासी बनाउन चाहन्नँ । हामी मिलापत्र गर्दैछौँ । जति बचत छ, सबैको व्यवस्थापन हुन्छ ।” भाषण गरिसकेपछि उनले हात हल्लाएर बिदा भए ।

एक हजार ५४३ बचतकर्ताले रकम ठगी गरेको आरोपमा जाहेरी दिएपछि अदालतले नेपालीलाई पुर्पक्षका लागि थुनामा पठाएको थियो । नेपालीले एक अर्ब ५४ करोड बचतकर्ताको रकम ठगी गरेको आरोप छ ।

देवकुमार नेपालीले सार्वजनिक स्थानमा भाषण गरिरहँदा यसको बारेमा स्थानीय प्रशासन भने अनभिज्ञ छ । प्रमुख जिल्ला अधिकारी नेत्र सुवेदीले भने उक्त घटनाको जानकारी नै नपाएको बताए ।

प्रहरी उपरीक्षक कँडेलले भने आफ्नो काम देवकुमार नेपालीको सुरक्षा गर्नु भएकाले मात्र सुरक्षा दिएको बताए ।

साना बचतकर्ताको रकम फिर्ता सुरु
इमेज बचत तथा ऋण सहकारी संस्था बागलुङ कार्यालयका बचतकर्ताको रकम फिर्ता दिन थालिएको छ । सरकारी वकिलको कार्यालयमा पुगेर पीडितले मुद्दा फिर्ता लिएपछि एक लाख रुपैयाँभन्दा कम बचत गर्ने बचतकर्ताको रकम फिर्ताको काम थालिएको हो ।

आइतबारदेखि सहकारीपीडित संघर्ष समितिका पदाधिकारीले सरकारी वकिलका प्रतिनिधि, प्रहरी र पत्रकारको रोहबरमा रकम फिर्ता सुरु गरेका हुन् ।

यो अभियानमा इमेज बचत तथा ऋण सहकारी संस्थाका पीडित बचतकर्ताहरूको संघर्ष समितिले तीन करोड रकम फिर्ता गराउने भएको हो । बागलुङ बजारमा रहेको मुख्य कार्यालयका एक लाख रुपैयाँभन्दा थोरै बचत भएकाहरू ३१६ जनाले रकम फिर्ता पाउनेछन् । तत्कालका लागि मीना ग्रुप कम्पनी प्रालिले उक्त रकम उपलब्ध गराएको हो ।

ठूलो रकम भएकाहरूलाई भने नेपालीको नाउँमा रहेका ४५ भन्दा बढी कित्ताको घरजग्गा बेचेर तिर्ने योजना समितिले बनाएको छ । ठगी मुद्दामा नेपालीलाई विपक्षी बनाएका जाहेरवालामध्ये गलकोट र बुर्तिवाङका ५४७ बचतकर्ताले एक महिनाअघि नै मेलमिलाप गरेका थिए । सदरमुकाम आसपासका ३१६ जनाको भने आइतबार मेलमिलाप गरेर रकम फिर्ता गरेका हुन् । समय नपुगेका बचतकर्तालाई क्रमशः रकम फिर्ता गरिने संघर्ष समितिका अध्यक्ष डिलबहादुर कार्कीले बताए । प्रभु बैंकबाट समितिले रकम फिर्ता गराएको छ ।

यसअघि बुर्तिवाङका ९२ जना र गलकोटका १७६ गरी २६८ जनाले बचत फिर्ता पाइसकेका हुन् । मेलमिलापबाट नेपालीको दाबी गरिएको बिगो रकमबाट २३ करोड ७५ लाख ४२ हजार ३४० रुपैयाँ घटेको छ ।