काठमाडौं । बेलायती राजकुमार एडवार्ड र उनकी श्रीमती सोफिया ६ दिने नेपाल भ्रमणको सिलसिलामा मंगलबार काठमाडौं आइपुगेका छन् । छुट्टाछुट्टै काठमाडौं आएका उनीहरूलाई परराष्ट्र सचिव अमृतबहादुर राईले त्रिभुवन अन्तर्राष्ट्रिय विमानस्थलमा स्वागत गरेका थिए ।

उनीहरूले आजै अपराह्न ४ बजे राष्ट्रपति रामचन्द्र पौडेललाई भेट्ने कार्यक्रम तय छ । एडवार्ड भोलि (माघ २३) ललितपुर, भक्तपुर र कीर्तिपुरका विभिन्न स्थानमा पुग्नेछन् ।

नेपाल रहँदा उनीहरू पोखरा पनि जानेछन् । उनी माघ २७ (आइतबार) गते फिर्ता हुने उनीहरूको कार्यक्रम छ ।

बेलायती राजपरिवारका सदस्य एडवर्ड रानी एलिजाबेथ द्वितीयाका कान्छा सन्तान हुन् । अर्थात्, उनी वर्तमान राजा चार्ल्स तृतीयाका कान्छा भाइ हुन् । बेलायतको राजगद्दीको उत्तराधिकारीमध्ये हाल उनी १५औँ नम्बरमा छन् ।