काठमाडौं । चलचित्र ‘दुःखी आत्मा’को ट्रेलर सार्वजनिक भएको छ । निर्माणपक्षले सोमबार (आज) सार्वजनिक गरेको ट्रेलरमा एडल्ट सिनेमाका संवादहरू प्रशस्त सुन्न पाइन्छ । दृश्यभन्दा पनि एडल्ट सिनेमामा हुने संवादसँगै मुख्य पात्रमा रहेको समस्या देखाइएको छ ।

सेलिब्रिटी कविको छवि बनाएको एक पात्रलाई माया गर्ने युवतीहरू कसरी ऊप्रति समर्पित भइरहेका छन् ट्रेलरमा देख्न सकिन्छ । सँगै उसमा रहेको शारीरिक दुर्बलताले ऊप्रति युवतीले गर्ने तिरस्कार पनि देखाइएको छ ।

ट्रेलरमा चलचित्रका मुख्य पात्र दयाहाङ राई, आँचल शर्मा, दीया मास्के, अनुपविक्रम शाही लगायतलाई देख्न सकिन्छ ।

दीपेन्द्र लामाको लेखन तथा निर्देशनमा तयार भएको चलचित्रमा वुद्दि तामाङ, रेयर राई, पुष्कर गुरुङ, कविता आले, आरती आचार्य, लोकेन्द्र लेखक, आशान्त शर्मा, दीया मास्के, लुनिभा तुलाधरलगायत कलाकारको अभिनय छ ।

हिमाल कडरियाको लगानी रहेको चलचित्रका कार्यकारी निर्माता सुदीप ढकाल हुन् । आलोक शुक्लाको छायांकन रहेको चलचित्रलाई निमेष श्रेष्ठले सम्पादन गरेका छन् ।

चलचित्र ‘दुखी आत्मा’मा श्रवण मुकारुङका १० कविता समावेश गरिएको छ । क्लर्क वर्क क्रिएसनको व्यानरमा निर्माण भएको चलचित्र फागुन २ गते रिलिज हुँदै छ ।