काठमाडौं । मोटोरोलाले नेपाली बजारमा आफ्ना स्मार्टफोन सार्वजनिक गरेको छ । फोनको बजारमा आफ्नो छुट्टै इतिहास बोकेको कम्पनी चौधरी ग्रुपमार्फत नेपाली बजारमा भित्रिएको हो ।

बिहीबार काठमाडौंमा एक कार्यक्रमको आयोजना गर्दै कम्पनीले आफ्ना फोन सार्वजनिक गरेको हो । मोटोरोला भारतका कार्यकारी पदका व्यक्तिहरुको उपस्थितीमा कम्पनीले नेपाली बजारमा आफ्ना उत्पादन सार्वजनिक गरेको हो ।
नेपालमा मोटोरोलाका लागि आधिकारीक बिक्रेता चौधरी ग्रुपले सबै किसिमका उपभोक्ताले खरिद गर्नसक्ने रेन्ज फोन भित्र्याएको छ ।

चौधरी ग्रुपका प्रबन्ध निर्देशक निर्वाण चौधरीले विशेष लिगेसी बोकेको ब्रान्डको नेपालमा यो एक महत्वपूर्ण नयाँ सुरुवात भएको बताएका छन् । मोटोरोलाका लागि भारत एवं सार्क देशका प्रमुख विपिन रैनाले नेपाली बजारमा यसले महत्वपूर्ण स्थान बनाउने विश्वास व्यक्त गरेका छन् ।

मोटोरोला पहिलो पटक बजारमा मानिसले किन्न पाउने गरी व्यापारिक रुपमा स्मार्टफोन उत्पादन गर्ने अमेरिकी कम्पनी हो ।

फोन र मूल्य

मोटो जी४५ : ८ जीबी र्याम र १२ जीबी स्टोरेज क्षमता रहेको यो फोनको मूल्य २४ हजार ४९९ रुपैयाँ छ ।

मोटो जी६४ : ८ जीबी र्याम र १२८ जीबी स्टोरेज रहेको यो फोनको मूल्य २७ हजार ४९९ छ । यसको १२ जीबी र्याम र २५६ जीबी स्टोरेज रहेको भेरियन्टको मूल्य ३० हजार ९९९ छ ।

मोटो जी८५ : ८ जीबी र्याम र १२८ जीबी स्टोरेज रहेको मोटो जी८५ को मूल्य ३४ हजार ४९९ रुपैयाँ छ । यस्तै १२ जीबी र्याम र २५६ जीबी स्टोरेज रहेको मोटो जी८५ को मूल्य ३७ हजाार ४९९ रुपैयाँ छ ।

मोटो एज ५० फ्युजन : १२ जीबी र्याम र २५६ जीबी स्टोरेजमा उपलब्ध फोनको मूल्य ४६ हजार ४९९ रुपैयाँ छ ।

मोटो जी०५, मोटो जी३५, मोटो एज ५० र मोटो रेजर ५० को मूल्य भने सार्वजनिक हुन बाँकी छ ।

कम्पनीले विशेष फोल्डेबल डिजाइनको मोटो रेजर ५० ले प्रिमिय प्रयोगकर्तालाई आर्कषित गर्ने अपेक्षा गरेको छ । 

यस्तै मोटो जी४५, जी६४ बजेटमैत्री फोन रहेको सीजीले जनाएको छ ।

फिचर

मोटोरोलाले आफ्ना फोनमा एन्ड्रोइडको पूर्ण अनुभव प्राप्त गर्न सकिने बताएको छ । कम्पनीले क्यामेरा फिचर, दिगो गुणस्तर, कटिङ एज इन्नोभेसन र प्रतिस्पर्धी मूल्यमा आफ्ना फोन उपलब्ध भएको बताएको छ ।

सीजीले सीजी डिजिटलमार्फत शुन्य प्रतिशत ब्याजदरमा विभिन्न इलेक्ट्रोनिक्स खरिद गर्न सकिने सुविधा समेत सार्वजनिक गरेको छ ।