काठमाडौं । ताप्लेजुङको फुङलिङ नगरपालिकाले पाथीभरा मन्दिर क्षेत्रमा केबलकार निर्माण कार्य अगाडि बढाउन सहयोग गर्न आन्दोलनरत पक्षलाई आग्रह गरेको छ । मंगलबार (माघ १५) बसेको कार्यापालिकाको ५४औँ बैठकबाट बन्द, हड्ताल नगर्न र वार्ताद्वारा समस्याको समाधान खोज्न आग्रह गरिएको हो ।

‘नो केबलकार’ समूहले आह्वान गरेको बन्द र निषेधका कार्यको भर्त्सना पनि बैठकबाट गरिएको नगर प्रमुख अमिर मादेनले जारी गरेको विज्ञप्तिमा उल्लेख छ ।

“...यस्ता बन्द, हड्तालले बालबालिका, वृद्ध, अशक्त, सम्पूर्ण तीर्थालुहरूलाई समेत असर पर्ने र झडप हुँदा नेपालीहरूकै क्षति हुने हुँदा फुङलिङ नगरपालिकाको गम्भीर ध्यानाकर्षण भएको...,” विज्ञप्तिमा भनिएको छ ।

संघ, प्रदेश र स्थानीय सरकारहरूबाट स्वीकृति लिई पाथीभरा मुकुम्लुङ केबलकार प्रालिले त्यहाँ केबलकार निर्माण कार्य थालेको विज्ञप्तिमा जनाइएको छ ।

“नो केबलकार समूहले विभिन्न माग राखी विरोधका गतिविधि गर्ने क्रममा मिति २०८१।१०।१२ गते फु.न.पा. ११ को बलुडाँडामा सुरक्षा निकाय र नो केबलकार समूहबीच झडप हुँदा सुरक्षा निकाय र विरोधी पक्षका केही व्यक्तिहरू घाइते भई विभिन्न अस्पताल तथा स्वास्थ्य संस्थामा उपचार गराइरहेका घाइतेहरूको शीघ्र स्वास्थ्यलाभको कामना गर्दछौँ,” विज्ञप्तिमा उल्लेख छ ।

मुक्कुमलुङ संरक्षण अन्तर्दलीय संघर्ष समितिले आज (माघ १५)देखि अश्चितकालीन मेची राजमार्ग, तमोर करिडोर, तेह्रथुमबाट ताप्लेजुङ छिर्ने नाकाहरू र ताप्लेजुङभित्र यातायात बन्दलगायत कार्यक्रम आह्वान गरेको छ ।

उक्त क्षेत्रमा केबलकार बनाउन नहुने बताउँदै आएका स्थानीवासी र प्रहरीबीच गएको शनिबार झडप भएको थियो । त्यसक्रममा प्रहरीले गोली चलाएको थियो । गोली लागेर घाइते भएका दुईसहित तीन प्रदर्शनकारीको उपचार जारी छ । काठमाडौंको महाराजगन्जस्थित त्रिवि शिक्षण अस्पतालमा उनीहरूको उपचार भइरहेको छ । झडपमा केही प्रहरी पनि घाइते भएका थिए । उक्त घटनापछि संघर्ष समितिले यातायात बन्दसहितका आन्दोलनका कार्यक्रम घोषणा गरेको हो ।