काठमाडौं । पोखरामा ‍मधेस प्रदेशका पर्यटकीय, धार्मिक, सांस्कृतिक तथा खानपिन संस्कृतिको प्रचार गरिएको छ । माघ १० देखि पोखरामा जारी ३३औँ 'औद्योगिक व्यापार मेला एवं आईटी महोत्सवमा–२०८१ मा' मधेसका पर्यटकीय स्थल चिनाउने काम भइरहेको ‘घुमौँ मधेस, बुझौँ मधेस’का कार्यक्रम संयोजक विकास ठाकुरले जानकारी दिए ।

“यस महोत्सवमा स्टल राखेपछि पोखरावासीहरूले मधेस घुम्ने इच्छा व्यक्त गर्नुभएको छ,” उनले भने, “मधेसका ऐतिहासिक तथा सांस्कृतिक सम्पदाबारे बुझाउने काम भइरहेको छ, धेरैजना उत्साहित हुनुभएको छ ।”

उनका अनुसार, पोखरामा जारी महोत्सवमा राखिएको ‘घुमौँ मधेस, बुझौँ मधेस’को स्टलबाट मधेसमा रहेका धार्मिक, सांस्कृतिक, पर्यटकीय क्षेत्रबारे जानकारी दिने गरिएको छ । त्यसैगरी, महोत्सव अवलोकनमा आउनेहरूले रौतहटको कटिया र बरमझियाको पेडाको स्वादसमेत चाख्न पाउँछन् ।

चन्द्रपुर उद्योग वाणिज्य संघका उदय सापकोटा सुरेनले पोखरामा मधेस चिनाउने स्टल व्यवस्थापन गरिरहेका छन् । “मधेसबारे धेरै चासो व्यक्त गरेको देखिन्छ, धेरैले मधेस घुम्नुपर्नेमा जोड दिइरहेका छन् । हाम्रा लागि उपलब्धि हो,” उनले भने ।

मधेस प्रदेश सरकार, उद्योग वाणिज्य तथा पर्यटन मन्त्रालयको कार्यक्रम ‘घुमौँ मधेस, बुझौँ मधेस’को स्टलमा हालसम्म हजारौँले अवलोकन गरेको ठाकुर बताउँछन् । आगुन्तकहरूलाई नेपाली र अंग्रेजी दुवै भाषामा प्रकाशित बुकलेट पनि वितरण गरिएको छ ।

महोत्सवको उद्घाटन नै मिथिलाको झिंझिया र थारू नृत्यबाट सुरु भएको ठाकुरले बताए । “पोखराले मधेसलाई महत्त्व दिएको छ । महोत्सवको उद्घाटनबाट नै जुन खालको मधेसको चिनारी गराउने कार्य भयो, यसले हिमालको काखमा रहेकाहरूलाई मधेसको समथर भूमिमा भ्रमण गर्न उत्साहित र प्रेरित गरेको छ ।”