काठमाडौं । नेपाल बिमा प्राधिकरणको आयोजनामा शुद्धीकरण निवारणसम्बन्धी अभिमुखीकरण कार्यक्रम सम्पन्न भएको छ । प्राधिकरणको केन्द्रीय कार्यालय, कुपण्डोलमा कार्यक्रमको आयोजना गरिएको हो ।

‘वित्तीय क्रियाकलापमा पारदर्शिता, सम्पत्ति शुद्धीकरण निवारणमा प्रतिबद्धता’ भन्ने नाराका साथ मनाउन लागिएको ‘सम्पत्ति शुद्धीकरण निवारण राष्ट्रिय दिवस’को पूर्वसन्ध्यामा कार्यक्रम आयोजना गरिएको हो ।

नेपाल बिमा प्राधिकरणका अध्यक्ष मदन दहालले सम्पत्ति शुद्धीकरण निवारण गर्ने राष्ट्रिय दायित्व बिमा क्षेत्रको पनि भएकाले बताए । उनले यही दायित्व अनुसार जिम्मेवारीपूर्वक काम गर्न बिमा कम्पनीका कार्यान्वयन अधिकारीहरूलाई निर्देशन दिए ।

बिमा क्षेत्रमा हुन सक्ने सम्पत्ति शुद्धीकरण निवारणका लागि नेपाल बिमा प्राधिकरणमा छुट्टै शाखा स्थापना गरिएको र बिमा कम्पनीहरूलाई समेत यससम्बन्धी कार्य गर्ने गरी छुट्टै शाखा स्थापना गर्न निर्देशन दिइएको छ ।

अध्यक्ष दहालले बिमा कम्पनीहरूलाई सम्पत्ति शुद्धीकरण निवारणसम्बन्धी तालिमलगायत आवश्यक प्राविधिक सहयोग गर्न प्राधिकरण तयार रहेको बताए ।

कार्यक्रममा डा. हरि कुमार नेपालले सम्पत्ति शुद्धीकरण निवारणसम्बन्धी समग्र विषयमा प्रस्तुति दिएका थिए । कार्यक्रममा नेपाल बिमा प्राधिकरणका निर्देशक कमलप्रसाद रेग्मी तथा उपनिर्देशक पदमप्रसाद सोडारी र जीवन बिमा कम्पनी, निर्जीवन बिमा कम्पनी, लघुबिमा कम्पनी तथा पुनर्बिमा कम्पनीका कार्यान्वयन अधिकारीहरूको सहभागिता थियो ।