काठमाडौं । कोशी प्रदेशका प्रदेशप्रमुख परशुराम खापुङले लोकतन्त्र र गणतन्त्रलाई बलियो बनाउन स्वच्छ प्रशासन आवश्यक रहेको बताएका छन् । 

प्रदेश लोकसेवा आयोगको पाँचौँ वार्षिकोत्सवका अवसरमा बुधबार विराटनगरमा आयोजना गरिएको कार्यक्रमलाई सम्बोधन गर्दै प्रदेश प्रमुख खापुङले लोकसेवा आयोगले स्वच्छ र सबल प्रशासन बनाउन निष्पक्ष भूमिका खेल्नुपर्ने बताए । उनले लोकसेवा आयोगलाई आफ्नो निष्पक्षता र विश्वसनीयता कायम राखेर अघि बढ्न आग्रह समेत गरे । 

कार्यक्रममा कोशी प्रदेशका मुख्यमन्त्री हिक्मतकुमार कार्कीले संघीय सरकारले आवश्यक कानुन निर्माण नगरिदिँदा प्रदेश सरकार चलाउन समस्या भइरहेको धारणा राखे । उनले प्रदेश संरचनालाई जनताको आवश्यकताको रूपमा परिणत गर्न प्रयासरत रहेको बताए । 

प्रदेश लोकसेवा आयोगले भौतिक पूर्वाधार अभाव र न्यून कर्मचारीको बाबजुद चार हजार ४३ पदका लागि विज्ञापन गरेको र दुई हजार १०२ जनालाई सिफारिस गरिएको प्रदेश लोकसेवा आयोगका सचिव तीर्थ धितालले जानकारी दिए ।