काठमाडौं । नेपाल बार एसोसिएसनले पाँचाैँ ल एसिया अन्तराष्ट्रिय मानव अधिकार सम्मेलनको आयोजना गर्ने भएको छ । बार एसोसिएसनले मंगलबार पत्रकार सम्मेलन गर्दै यसबारे जनकारी दिएको हो । 

आउँदो फागुन ३ गतेदेखि फागुन ५ गतेसम्म दुई दिन सम्मेलनको आयोजना गर्ने बारले जानकारी दिएको छ । सम्मेलनको राष्ट्रपति रामचन्द्र पौडेलले उद्घाटन गर्ने कार्यक्रम रहेको छ । 

‘मानव अधिकारको सहनशीलता : प्राविधिक, वातावरणीय र सामाजिक चुनौतीहरूको सामना’ भन्ने विषयवस्तुका मुद्दालाई सम्मेलनमा सम्बोधन गरिने नेपाल बार एसोसिएसनका अध्यक्ष गोपालकृष्ण घिमिरले जानकारी दिए । नेपालमा पहिलोपटक सम्मेलनको आयोजना गर्न पाउँदा गर्व महसुस भएको अध्यक्ष घिमिरले बताए । 

विश्वभरका न्यायपालिका, कानुन व्यवसायी, मानवअधिकारकर्मीको सहभागितामा नेपालमा हुने यस सम्मेलनले नेपालको मानवअधिकार संरक्षण र प्रवर्द्धनमा योगदान पुग्ने उनले विश्वास व्यक्त गरे । 

सम्मेलनमा ल एसियाका सदस्य गैरसदस्यगरी २० भन्दा बढी राष्ट्रका १५० सयभन्दा बढी प्रतिनिधिले सहभागिता जनाउनेछन् । सम्मेलनमा मानव अधिकार, आदिवासी जनजाति, समुदायका अधिकारी गरी १२ वटा विषयगत सत्रमा छलफल हुने बार एसोसिएसनले जनाएको छ ।

ल एसियाले कानुनी पेसाको हक हितका लागि आवाज मुखरित गर्ने संस्थाको रूपमा विगत ५० वर्षदेखि काम गर्दै आएको छ ।