काठमाडौं । भारतले केही समयअघिदेखि रोक्का गरेको नेपाली सिमेन्ट, जस्तापाता, प्लाइउडलगायत सामग्रीको ‘बीआईएस’ प्रमाणपत्र नवीकरण गरेको छ ।

गत पुस २७ र २८ मा भएको नेपाल–भारत वाणिज्य सचिवस्तरीय बैठकमा ‘बीआईएस’ प्रमाणपत्र प्राप्ति, नवीकरण तथा निर्यात सहजीकरणको विषयमा विशेष छलफल भएको थियो । छलफलमा यो विषय नेपालका तर्फबाट प्राथमिकताका साथ उठेपछि भारतीय पक्षले समस्या समाधान गर्ने प्रतिबद्धता जनाएको थियो ।

भारत सरकारले सिमेन्ट, जस्तापाता, प्लाइउड, सेनेटरी प्याड, फुटवेयरलगायत सामग्री निर्यातमा ‘बीआईएस’ प्रमाणपत्र अनिवार्य गरेको छ । २८ फेब्रुअरी २०२५ मा राजपत्रमा सूचना प्रकाशित गर्दै स्वदेशी (भारतीय) तथा विदेशबाट आयात हुने सामग्रीमा ‘बीआईएस’ अनिवार्य गरेको हो ।

भारतले ‘बीआईएस’ प्रमाणपत्र नवीकरण नगर्दा नेपालबाट पाँच महिनादेखि भारततर्फ सिमेन्ट निर्यात र एक महिनादेखि प्लाइउड निर्यात रोकिएको थियो । बीआईएस प्रमाणपत्र नवीकरणको विषयलाई लिएर नेपालका व्यवसायीसमेत भारत गएका थिए ।

‘बीआईएस’ प्रमाणपत्र प्राप्त गरेपछि निर्यात सहज हुने नेपाल प्लाइउड उत्पादक संघका अध्यक्ष होमप्रसाद घिमिरेले बताए । उनले भारतले अहिले धमाधम बीआईएस नवीकरण गरिरहेको बताए ।

"अहिले अहिले १०–१२ वटा उद्योगले बीआईएस नवीकरण भएको छ । अरू उद्योगको पनि आउने क्रममा छ । हाम्रो नयाँ प्रमाणपत्र प्राप्त गरेका हौँ, जसले गर्दा निर्यात सहज हुनेछ," उनले भने ।

केही समयअघि भारत निर्यातका लागि काँकडभिट्टा पुर्‍याइएका ३४ ट्रक प्लाइउड बीआईएस प्रमाणपत्रको अभावमा नाकामै रहेको उनको भनाइ छ ।