काठमाडौं । वरिष्ठ अधिवक्ता दिनेश त्रिपाठीमाथिको आक्रमणविरुद्ध आइतबार सर्वोच्च बार एसोसिएसनले विरोध कार्यक्रम राख्यो । हातमा कालोपट्टीसहित आयोजित विरोध प्रदर्शनमा नेपाल बार एसोसिएसनका पूर्वअध्यक्षहरूसहित वरिष्ठ अधिवक्ताहरूको उलेख्य उपस्थिति थियो ।

नेपाल बार एसोसिएसनको आसन्न निर्वाचनका कारण पनि वरिष्ठ अधिवक्ताहरूको उपस्थिति उलेख्य देखिन्थ्यो ।

स्वर्णलक्ष्मी सहकारी ठगी मुद्दामा यही माघ २ गते काठमाडौं जिल्ला अदालतका न्यायाधीश माधवप्रसाद अधिकारीको इजलासबाट रास्वपा सभापति रवि लामिछाने ६० लाख धरौटीमा छुटेका थिए ।

त्यतिखेर वरिष्ठ अधिवक्ता त्रिपाठीले पीडितहरूका तर्फबाट जवाफी बहसमा संगठित रूपमा पीडितको पैसाको अपचलन भएकाले लामिछानेलाई थुनामै राख्नुपर्ने दलिल पेस गरेका थिए ।

उक्त बहस सकिएर बाहिरिँदै गर्दा अदालत परिसरबाहिर वरिष्ठ अधिवक्ता त्रिपाठीमाथि हातपात भएको थियो ।

उक्त आक्रमणको औपचारिक विरोध कार्यक्रममा वरिष्ठ अधिवक्ताहरूले वकिलको पेसागत धर्म र त्यसमा रहनुपर्ने नागरिक दृष्टिकोणसहितका विषयमा बौद्धिक खुराकसहित सम्बोधन गरेका थिए ।

सम्बोधन सकिएपछि वरिष्ठ अधिवक्ताहरू नेपाल बार एसोसिएसनका पूर्वअध्यक्ष शम्भु थापा र पूर्वमहासचिव रमन श्रेष्ठबीच ठट्यौली चल्यो ।

ठट्यौलीमा विरोध प्रदर्शनकै सन्दर्भ पूर्वअध्यक्ष थापाले निकालेका थिए । उनले विपक्षमा बहस गरेकै आधारमा रास्वपा समर्थक कुटपिटमा उत्रिएको भन्दै श्रेष्ठसँग व्यंग्य गरेका थिए ।

रमनसँगै व्यंग्यको कारण थियो, श्रेष्ठले लामिछानेका तर्फबाट बहस गरेका थिए भने कुटाइखाने वरिष्ठ अधिवक्ता त्रिपाठीले सहकारीपीडितका तर्फबाट ।

पीडितका तर्फबाट निःशुल्क बहस गरेका त्रिपाठीलाई रास्वपा समर्थकले भने रविविरुद्धको बहसका रूपमा अथ्र्याउँदै आक्रमण गरेका थिए । त्यहीकारण थापाले श्रेष्ठसँग ठट्यौली संवाद गरेका हुन् ।

संवादमा वरिष्ठ अधिवक्ता थापाले भने, “तपाईंले रास्वपालाई यसरी वकिलहरूमाथि आक्रमण नगर भन्नुपर्ने भयो रमनजी । नत्र त वकिलहरूको त बेहाल हुने भयो नि !”

थापाले ठट्यौलीमै गम्भीर प्रश्न उठाएपछि श्रेष्ठले भने संवाद छोट्याएका थिए ।

“खोइ के हो ? के हो दाइ ?,” रमनले ठट्यौलीमा सहभागी नहुने आशयसहित बिदा लिए ।

त्यसबारे थप जिज्ञासा राख्दा श्रेष्ठले संवादको विषय थप राख्न चाहेनन् । तर, उनले जसले, जुन पक्षबाट बहसमा रहेको भए पनि आक्रमण गर्नु गलत भएको टिप्पणी गरे ।

“वकिलले त पक्षको प्रतिनिधित्व गरेर बहस गर्ने हो । त्यसका आधारमा आक्रमण गर्नु सर्वथा गलत हो,” श्रेष्ठले भने, “मैले त फी लिएर रविजीको तर्फबाट बहस गरेको हुँ । रास्वपाका विषयमा मलाई जानकारी हुने वा सुझाव दिने कुरा भएन नि !”

थापाले भने आफूले औपचारिक कार्यक्रममा नबोलेको कुरा समाचारको विषय बन्नु नहुने भन्दै संवादका सबै विषय समाचार नबन्ने बताए ।

“औपचारिक कार्यक्रमभन्दा बाहिर त जे जे विषयमा जसरी पनि संवाद हुन सक्ने भयो । सबै विषय समाचार त हुँदैनन् नि !,” थापाले बह्रखरीसँग भने, “औपचारिक कार्यक्रममा जे भनियो त्यो पो समाचारको विषय बन्ने हो ।”

रास्वपा पार्टीमा आबद्ध नरहेका श्रेष्ठलाई थापाले पक्षको प्रतिनिधित्व गरेकै आधारमा व्यंग्य गरेका थिए । श्रेष्ठले पनि रास्वपाको जिम्मा लिन नसक्ने र आक्रमणको समर्थन समेत गर्न नसक्ने हुँदा बहस नै छोट्याएका थिए ।

नेपाल बार एसोसिएसनको महासचिवसम्म भएर काम गरेका श्रेष्ठ आसन्न बार चुनावमा अध्यक्षको उमेदवार बन्न इच्छुक छन् । त्यसैले पनि श्रेष्ठ पेसागत धर्मकै पक्षमा उभिन र विवादका विषयमा अल्झन चाहँदैनन् ।