काठमाडौं । सर्वाेच्च अदालतबाट २०६८ भदौ २१ गते नेपाल वायुसेवा निगमका पूर्वअध्यक्ष रामाज्ञाप्रसाद चर्तुवेदीलाई भ्रष्टाचारी ठहर गर्दै सम्पत्ति जफतको फैसला सुनाएको थियो । उनीसँग भएको सम्पत्तिमध्ये स्रोत नखुलेको एक करोड ३९ लाख २४ हजार रुपैयाँ भ्रष्टाचारबाटै आर्जित भएको ठहर गरी बिगो बराबर जरिवानासहित जफत गर्नू भन्ने फैसला थियो ।

तर, सर्वाेच्च अदालतको फैसला १३ वर्षसम्म कार्यान्वयन नहुँदा सम्पत्ति जफत भएन । चर्तुवेदीको पनि २०७८ असोजमै निधन भइसकेको छ ।

यतिखेर गृह मन्त्रालय फैसलाअनुरूप भ्रष्टाचार आर्जित सम्पत्ति जफत गर्न अघि बढ्दै छ । चर्तुवेदीसहित सिचाइँ विभागका पूर्वमहानिर्देशक आमोदानन्द मिश्रको पनि स्रोत नखुलेको सम्पत्ति जफत हुने भएको छ । मिश्रको पनि निधन भइसकेको छ ।

भ्रष्टाचार गरेर आर्जन गरेको सम्पत्ति जफतको फैसला भएको लामो समयपछि जफतको प्रक्रिया अघि बढाएको हो ।

भ्रष्टाचार, अवैध र आतंकवाद गतिविधिबाट आर्जित सम्पत्ति जफतका लागि गृह मन्त्रालयले मन्त्रिपरिषद्‌मा फाइल पठाएको जानकारी गृह मन्त्रालयअन्तर्गतको कसुरजन्य सम्पत्ति व्यवस्थापन विभागका महानिर्देशक सुरेश पन्थीले दिए ।

यसरी हाल सम्पत्ति जफतको प्रक्रिया अघि बढाएकामा पाँच जना पूर्वप्रशासक र एकजना आपराधिक गतिविधिमा संलग्न भारतीय नागरिक छन् ।

भ्रष्टाचारी ठहरिएका मुरारीबहादुर कार्की, केशरजंग खड्का, सरस्वती ढुंगाना, सरिता गिरी राई तथा उनका परिवारको नाममा रहेका काठमाडौंका ठाउँको सम्पत्ति जफत गर्न लागिएको हो ।

मुरारीबहादुर कार्की आन्तरिक राजस्व विभागका पूर्वनिर्देशक हुन् । उनी २०६९ जेठमा भ्रष्टाचारी ठहरिएका थिए । सर्वाेच्च अदालतले कार्कीसँग भएको सम्पत्तिमध्ये ३६ लाख १५ हजार स्रोत नखुलेको सम्पत्ति भएको हुँदा त्यसबाट बढे/बढाएको जफत गर्नू भनेको थियो ।

महानिर्देशक पन्थीका अनुसार, आमोनन्द मिश्रले छोरा अजितकुमार मिश्रको नाममा रहेको लाजिम्पाटको आठ आना दुई पैसा एक दाममा बनेको घरसहित जग्गा जफत गर्ने प्रक्रिया सुरु भएको छ । त्यस्तै, सरस्वती ढुंगानाको ललितपुर थसिखेलको एक रोपनी जग्गा जफत हुनेछ ।

यसैगरी, मुरारी कार्कीकी आफन्त शकुन्तला कार्कीको नाममा रहेको एक रोपनी जग्गा र त्यसमा बनेको साढे तीनतले घर, केशरजंग खड्काको कोटेश्वरमा रहेको दुई आना तीन दाम जग्गा, रामाज्ञा चतुर्वेदीको पेप्सिकोलाको दुई आना जग्गा जफतको प्रक्रिया अघि बढेको हो ।

उनीहरूले सरकारी सेवामा रहेका बखत भ्रष्टाचार गरेर आर्जन गरेको सम्पत्ति हो । यसरी नै सरिता गिरी राईको जोरपाटीको ९० वर्गमिटर जग्गा र जोरपाटीकै ३७९.८० वर्गमिटरमा बनेको घर र जग्गा जफतको प्रक्रिया अघि बढेको हो । सरिता राई भने कुनै सार्वजनिक पद धारण गरेकी व्यक्ति होइनन् ।

उनी भारतीय नागरिक निरञ्जन होजाईकी श्रीमती हुन् । भारत आसमका होजाईले सिन्धुपाल्चोककी सरितासँग विवाह गरेका थिए । होजाईले निर्मल राईको नाममा किर्ते नागरिकतासमेत लिएको खुलेको थियो ।

होजाईले अवैध तरिकाले आर्जन गरेको सम्पत्ति सरिता गिरीका नाममा राखेका थिए । निरञ्जन होजाई लागुऔषध कारोबारीदेखि विभिन्न आपराधिक गतिविधिमा संलग्न थिए । सर्वोच्च अदालतले उनको अवैध कारोबारबाट आर्जित सम्पत्ति शुद्धीकरण गरेको ठहरसहित जफत गर्न २०७२ माघ सालमै फैसला गरेको थियो ।