जेरुसेलम । इजरायली सेनाले प्यालेस्टाइनी इस्लामिक लडाकु समूह (हमास)विरुद्ध गाजामा आक्रमण जारी राखेको छ । समूहले रिहा हुने बन्धकको सूची उपलब्ध नगराएकाले युद्धविराम अझै लागु नभएको इजरायली सेनाले जनाएको छ ।

“आईडीएफले अहिले पनि गाजा क्षेत्रभित्र आक्रमण जारी राखेको छ । प्रधानमन्त्रीको निर्देशनानुसार हमासले आफ्नो प्रतिबद्धता पूरा नगरेसम्म युद्धविराम लागु हुने छैन,” इजरायली सेनाका प्रवक्ता रियर एडमिरल डेनियल हागारीले एक टेलिभिजन वक्तव्यमा भनेका छन् ।

एएफपीको फुटेजमा भने मध्य सहर देइर अल–बलाहमा स्थानीय समयानुसार ८ः३० बजेपछि सयौँ गाजावासीले युद्धविराम लागु भएकामा खुसी व्यक्त गर्दै प्रदर्शन गरिरहेका छन् । धेरैले मोबाइलमा फोटो खिचिरहेका थिए, ताली बजाइरहेका थिए र एकार्कालाई अँगालो हालेका थिए ।

करिब ३० मिनेटपछि एएफपी टीभीले उत्तरपूर्वी गाजामा खैरो धुवाँको बाक्लो मुस्लो उठेको देखायो । त्यस क्षेत्रमा इजरायली सेनाले हवाई आक्रमण गरेपछि उक्त दृष्य देखिएको हो ।

हमासले सम्झौताअनुरूप फिर्ता गर्ने ३३ बन्धकको सूची पठाउन प्राविधिक समस्याका कारण ढिलो भएको जनाएको छ । रासस/एएफपी