काठमाडौं । राष्ट्रिय स्वतन्त्र पार्टी (रास्वपा)का सभापति एवं सहकारी ठगीका आरोपित रवि लामिछानेले आफूविरुद्धको मुद्दा खारेज गर्न माग गरेका छन् । बुधबार काठमाडौं जिल्ला अदालतमा थुनछेक र सरकारी वकिलको जवाफी बहस सकिएपछि उनले न्यायाधीश माधवप्रसाद अधिकारीसँग यस्तो अनुरोध गरेका हुन् ।

“मैलै नागरिकता लिँदा प्रक्रिया पुगेको थिएन, त्यसले कसैलाई हानि नगरे पनि मेरो सांसद पद गयो,” न्यायाधीशसँग अनुमति मागेर लामिछानेले भने, “यो मुद्दामा प्रक्रिया पुगेको छैन, प्रक्रियामा नै त्रुटि छ । त्यसैले यो खारेज गरियोस् श्रीमान् ।”

बुधबार लामिछानेतर्फबाट वरिष्ठ अधिवक्ता तथा पूर्वमहान्यायाधिवक्ता रमन श्रेष्ठ, वरिष्ठ अधिवक्ता एवं पूर्वमहान्यायाधिवक्ता सुशीलकुमार पन्त, सुरज बस्नेत र सुरेन्द्र काफ्लेले बहस गरेका थिए । अधिवक्ता राजेन्द्र सेढाइँले भने बहस नोट मात्र बुझाएका थिए ।

त्यसपछि सरकारी वकिलले जवाफी बहस गरेका थिए । सरकारी वकिलले जवाफी बहस सकाएपछि अहिले आदेश लेखन कार्य भइरहेको छ ।अदालतले साधारण तारेख, धरौटीमा रिहा वा पुर्पक्षका निम्ति थुनामा पठाउनेमध्ये एक आदेश गर्नेछ ।

काठमाडौंको कालीमाटीस्थित स्वर्णलक्ष्मी बहुउद्देश्यीय सरकारी संस्थाको रकम अपचलन गरेको अभियोगमा लामिछानेसहित ३९ जनालाई प्रतिवादी बनाइएको छ ।

उक्त मुद्दामा सोमबार सरकारी वकिल कार्यालयका तर्फबाट नौजनाले बहस गरेका थिए । सोही दिन जाहेरवालाका तर्फबाट डा. सुरेन्द्र भण्डारी र दिनेश त्रिपाठीले बहस गरेका थिए ।

थुनछेक बहस बाँकी रहेकाले उक्त दिन उनलाई अदालतले न्यायिक हिरासतमा पठाएको थियो । उनलाई जिल्ला प्रहरी परिसर काठमाडौंको जिम्मा लगाइएको थियो ।

यही पुस २५ गते कास्की जिल्ला अदालतले लामिछानेलाई पोखराको सूर्यदर्शन सहकारी ठगी, संगठित अपराध र सम्पत्ति शुद्धीकरणसम्बन्धी मुद्दामा ६५ लाख रुपैयाँ धरौटीमा छाड्ने आदेश दिएको थियो । धरौटी रकम बुझाएर सोही दिन उनी थुनामुक्त भएका थिए ।