चितवन । चितवनको देवघाटमा सुरु भएको देवघाट महामहोत्सवमा कथावाचनका निम्ति आइपुगेकी ख्यातिप्राप्त कथावाचिका देवी प्रतिभालाई चितवनको भरतपुर महानगरपालिकाले स्वागत गरेको छ ।

भरतपुर महानगर प्रमुख रेणु दाहालले देवी प्रतिभालाई महानगरमा स्वागत गरेकी हुन् । सो अवसरमा महानगर प्रमुख दाहालले देवी प्रतिभा देशको गौरव भएको उल्लेख गरिन् । 

भरतपुर महानगरले जनचाहनाअनुरूपको विकासका कामलाई प्राथमिकता दिएको उल्लेख गर्दै उनले भरतपुर क्षेत्रको प्रचार र प्रवर्द्धनमा भूमिका खेल्न आग्रह पनि गरिन् । 

सो अवसरमा देवी प्रतिभाले भरतपुर टेक्नेबित्तिकै विकासको गति देखेर आफू खुसी भएको प्रतिक्रिया दिइन् । देवी प्रतिभाले अब १० दिनसम्म देवघाटमा कथा प्रवचन गर्ने कार्यक्रम रहेको महामहोत्सवका संयोजक डा. केशव भुर्तेलले जानकारी दिए । 

देवघाटधाममा मातापिता आश्रम निर्माणका लागि माघ ३० गतेसम्म देवघाट महामहोत्सव चल्ने बताइएको छ ।