काठमाडौं । सरकारले राष्ट्रिय परिचयपत्रको सूचना प्रविधि प्रणाली मर्मतसम्भारका लागि बोलपत्र आह्वान गर्ने भएको छ । गृह मन्त्रालयअन्तर्गतको राष्ट्रिय परिचयपत्र तथा पञ्जीकरण विभागले सिस्टमको मर्मतसम्भार एवं सर्पोट उपलब्ध गराउने कम्पनी खोज्न बोलपत्र आह्वान गर्न लागेको हो ।

राष्ट्रिय परिचयपत्रको सिस्टम निमार्ण गरी कार्ड छाप्नेसम्मको कामका लागि सरकारले ०७६ मा फ्रान्सको कम्पनीसँग सम्झौता गरेको थियो । फ्रान्सको आईडीईएमआईए कम्पनीले यो प्रणाली विकास गरेको थियो ।

त्यसपछि कम्पनीले सम्झौताअनुसार, करिब तीन वर्ष मर्मतसम्भारको काम गरेको थियो । दुई वर्ष भने प्रतिस्पर्धाबिना नै आईडीईएमआईएले वार्षिक मर्मतसम्भार (एएमसी)को जिम्मा पाएको थियो ।

गत वर्ष ०८० को भदौमा मन्त्रिपरिषद्को बैठकले अघिल्लो वर्षको भुक्तानी दिने र थप एक वर्ष आईडीएमआईलाई नै जिम्मा दिने निर्णय गरेको थियो ।

यसै वर्ष ०८१ को भदौमा पछिल्लोपटकको मर्मतसम्भार सम्झौता सकिएपछि सरकारले अब प्रतिस्पर्धा गराएर कम्पनी छनोट गर्ने तयारी गरेको हो ।

प्रणालीको सोर्स कोड भने आईडीईएमआईसँग रहेको विभाग स्रोतको भनाइ छ । सरकारले सोर्स कोड आफैँ राखेर आफ्नै जनशक्तिले नै व्यवस्थापनको काम गर्ने भने पनि त्यसो गर्न सकेको छैन । प्रणालीको डाटासहितको सर्भर भने एकीकृत डाटा व्यवस्थापन केन्द्र र डाटा रिकभरी सेन्टरमा रहेको विभागले जनाएको छ ।

गएको भदौयता विभागकै कर्मचारीले प्रणालीमा कुनै समस्या आएमा व्यवस्थापन गरिरहेका छन् । नागरिकको महत्त्वपूर्ण विवरणसहितको सिस्टममा समस्या आउन सक्ने भन्दै विभागले मर्मतसम्भारको जिम्मा दिन अन्तर्राष्ट्रिय बोलपत्र आह्वान गर्ने तयारी गरेको हो ।

विभागका सूचना अधिकारी शिवराज सेढाईले टेन्डर आह्वान गर्न विभागले तयारी गरिरहेको बताएका छन् । बोलपत्रमा सहभागी हुने योग्य कम्पनीले जिम्मा पाउने उनको भनाइ छ ।

“हामीले अन्तर्राष्ट्रिय टेन्डर आह्वान गर्छाैं । स्पेसिफिकेसन र आवश्यकता अनुसारको योग्य कम्पनी नेपाल वा विदेशको जुन हुन्छ, त्यसले ठेक्का पाउला,” विभागका निर्देशक सेढाईले भने ।