काठमाडौं । थाहा फिल्म फेस्टिभलको दोस्रो संस्करण यही पुस २८ गते आइतबारदेखि माघ १ गते मंगलबारसम्म आयोजना हुने भएको छ । शर्ट फिल्म, फिचर फिल्म र डकुमेन्ट्रीसमेत गरी जम्मा २० फिल्म प्रदर्शनमा राखिने भएका छन् । 

महोत्सवमा सहभागिताका लागि पेस भएका ४६ फिल्ममध्येबाट जम्मा २० फिल्म छानिएको आयोजक थाहा कला केन्द्रले जनाएको हो । 

मकवानपुरको थाहा नगरपालिकास्थित बज्रबाराहीमा आयोजना हुने यस महोत्सवमा ‘पखेटा’, ‘टुल्की’, ‘बाटो’, ‘लाखे’, ‘सतिदेवी’, ‘मोदिवेनी’लगायत  फिचर फिल्म छनोट भएका छन् । 

सर्ट फिल्मतर्फ ‘बेली’, ‘अन्तर्वार्ता’, ‘द रोप अफ होप’, ‘निर्देश’, ‘दुई सय रुपैयाँ’, ‘खिल’ लगायत छन् ।

डकुमेन्ट्रीतर्फ ‘हिउँ चितुवा’, ‘गल्र्स रिराइटिङ डेस्टिनी’लगायत रहेको आयोजकको प्रेस नोटमा उल्लेख छ । महोत्सवमा फिल्म प्रदर्शनीसँगै ‘फिल्म समीक्षा’ र ‘नेपाली सिनेमाको विविधता’जस्ता समसामयिक विषयमाथि छलफल हुनेछ । 

‘पर्यटनका लागि चलचित्र’ नारासहित आयोजना हुँदै आएको महोत्सवले फिल्ममार्फत् आन्तरिक पर्यटनलाई जोड्ने लक्ष्यसमेत लिएको छ ।