काठमाडाैं । नेकपा एमालेबाट निष्कासित नेता डा. भीम रावलले देशभक्तिपूर्ण वैकल्पिक राजनीतिक शक्ति निर्माण गर्ने घोषणा गरेका छन् । बुधबार काठमाडौंमा पत्रकार सम्मेलन गर्दै रावलले वैकल्पिक राजनीतिक शक्ति निर्माणको घोषणा गरेका हुन् । 

अभियान पूर्ण भएपछि त्यसलाई नै पार्टीको रूपमा विकासित गर्ने उनले बताए । एमाले अध्यक्ष केपी ओलीका स्वेच्छाचारी, निरंशुक र तानाशाही निर्णय र कामविरुद्ध तथा राष्ट्र र जनताको हित रक्षा र समृद्धिका लागि मातृभूमि जागरण अभियानका साथ देशभक्तिपूर्ण शक्ति निर्माण गर्ने उनको भनाइ छ । 

अभियानका क्रममा भ्रष्टाचार र कुशासनका विरुद्ध जनतालाई जागरुक बनाइने रावलको भनाइ छ । पत्रकार सम्मेलनका क्रममा रावलले एमाले अध्यक्ष केपी ओलीप्रति दर्जनौँ प्रश्न र आरोप लगाए । पार्टीभित्र आफू केपी ओलीको कोपभाजनमा परेको भन्दै उनले आफूलाई स्पष्टीकरण नभई दोषपत्र थमाइएको जिकिर गरे । 

ओलीसँग छलफलका लागि पटक–पटक समय लिन खोजे पनि मिलाउन नसकेको उनले बताए । उनले पार्टी गतिविधिमा ओलीले नै निषेध गरेकाले त्यसको जवाफ पनि ओलीले नै दिनुपर्ने धारणा राखे । रावलले अहिलको सरकारबाट समाजवाद ल्याउने कुरा पत्याउन नसकिने भन्दै ओली सत्ताको दुरुपयोग गरी नव तानाशाह बन्न खोजेको आरोप लगाए । 

अहिले सत्ताको खेलमा ठूला दल भन्नेहरू सद्धान्तहीन बन्न पुगेको र भ्रष्टाचारमा संलग्न ठूला व्यक्तिलाई जोगाउने प्रयास भइरहेको रावलले बताए । पार्टीका नीति, निर्णय र नेतृत्वविरुद्ध अभिव्यक्ति दिएको भन्नेबारे रावलले एमाले नेताले फैलाएको हल्ला निराधार र अमूर्त रहेकाले यसले कार्यकर्ता र जनतालाई भ्रमित गर्दै आफूविरुद्ध जनमत सिर्जना गर्ने कुत्सित आशयबाट प्रेरित रहेको तर्क गरे । 

त्यस्तै रावलले संविधानको मार्ग निर्देशन र पार्टीका घोषित कार्यक्रम एवं नीति तथा निर्वाचन घोषणा पत्रमा गरेका प्रतिबद्धता पूरा गर्नेतर्फ कुनै इमानदार प्रयास नभएको आरोप लगाए । बरु पटकपटक पार्टीभित्र कुनै छलफल नै नगरी ओलीले राजनीतिलाई अस्थिर तुल्याउनेतर्फ अग्रसर भएको उनले बताए । उनले पार्टीको दशौँ महाधिवेशनमा धाँधलीका विभिन्न काम केपी ओलीकै निर्देशनमा भएको जिकिर गरे ।